Din

Ana səhifə

Din

Bakı və Xəzəryanı yepiskopu Aleksandr Ata Azərbaycanın icazəsi olmadan Xankəndində kilsənin inşası ilə əlaqədar Moskva Pravoslav Kilsəsinə etiraz bildirib

21 iyun 2010 09:12 (UTC +04:00)

“Dağlıq Qarabağ Azərbaycan ərazisidir, orada istənilən məbəd - istər pravoslav, istər katolik kiləsi, istər müsəlman məscidi və s. olsun - Azərbaycan hökumətinin icazəsi ilə inşa edilə bilər. Amma Xankəndində pravoslav kilsənin bünövrəsi Azərbaycanın icazəsi olmadan qoyulub. Həmin ərazidə hansısa icma qeydə alına bilər, amma inşa aparmaq üçün icazə alınmalıdır”, - deyə Konstantin Ata vurğulayıb.

Onun sözlərinə görə Bakı və Xəzəryanı yepiskopu Aleksandr Ata Moskva Pravoslav Kilsəsinə müraciət edərək, Xankəndində Azərbaycanın icazəsi olmadan kilsənin inşasına başlanmasına, «İnterfaks» agentliyinin Bakı nümayəndəliyinə müraciət edərək isə onun həmin təməlqoyma mərasimində guya iştirak etdiyi barədə məlumatlara etirazını bildirib.

Həmin etirazdan sonra «İnterfaks-Religiya» öz məlumatını yeniləyib. Yenilənmiş variantda deyilir ki, təməlqoyma mərasimində Moskva Patriarxlığının Xarici Kilsələrarası Şöbəsinin nümayəndəsi Aleksandr Vasyutin iştirak edib.

Xatırladaq ki, ilk məlumatda bildirilirdi ki, Xankəndində keçirilən mərasimdə Bakı və Xəzəryanı yepiskopu Aleksandr Ata da iştirak edib, kilsənin tikiləcəyi yerə özül daşı və itaət etmək üçün xaç qoyub, mərasimdən sonra isə separatçı Dağlıq Qarabağ rejiminə rus icması üçün kilsənin tikilməsinə dair verdiyi qərara görə minnətdarlıq edib. Lakin Aleksandr Ata APA-ya açıqlamasında Xankəndinə getməsi və orada kilsənin təməlqoyma mərasimində iştirak etməsi barədə xəbərləri təkzib edib: “Mən heç vaxt Dağlıq Qarabağda olmamışam, hər hansı kilsənin təməlqoyma mərasimində də iştirak etməmişəm. Xəzəryanı Yeparxiyadan da heç kim həmin tədbirdə iştirak etməyib”.

Konstantin Ata onu da bildirib ki, Bakı və Xəzəryanı Yeparxiyaya bütün Azərbaycan və Dağıstan daxildir. “Beynəlxalq ictimaiyyət tərəfindən Dağlıq Qarabağ Azərbaycanın ayrılmaz hissəsi kimi tanındığı üçün bu ərazi də bizim Yeparxiyaya aiddir. Azərbaycan Dağlıq Qarabağda öz nəzarətini bərpa etdikdən sonra Yeparxiya orada da fəaliyyət göstərəcək”, - deyə o qeyd edib.

Aleksandr_Ata