Din

Ana səhifə

Din

Şeyxülislam Hacı Allahşükür Paşazadə Rusiya və Türkiyənin Azərbaycandakı səfirlərini qəbul edib

06 iyul 2010 14:43 (UTC +04:00)

Bakı. Laçın Sultanova-APA. Qafqaz Müsəlmanları İdarəsinin (QMİ) sədri Şeyxülislam Allahşükür Paşazadə bu gün Rusiya və Türkiyənin Azərbaycandakı səfirləri Vladimir Doroxin və Hülusi Kılıc ilə ayrı-ayrılıqda görüşlər keçirib. QMİ-nin mətbuat xidmətindən APA-ya verilən məlumata görə, Vladimir Doroxin Rusiya prezidenti Dmitri Medvedyevin salamlarını yetirib və məhz dövlət başçısının bilavasitə tapşırığı ilə QMİ sədri ilə görüşdüyünü diqqətə çatdırıb.

D. Medvedyevin Şeyxülislam Hacı Allahşükür Paşazadənin dinlərarası və millətlərarası dialoq işinə bəxş etdiyi töhfələri, dini liderlərin səmərəli əməkdaşlığı yönündə səylərini olduqca yüksək dəyərləndirdiyini vurğulayan səfir Bakı sammitinin uğurla nəticələnməsi münasibətilə Rusiya prezidentinin təbriklərini Şeyxülislama çatdırıb. Səfir bildirib ki, Şeyxylislamın Rusiya və Azərbaycan xalqları arasında dostluq və qardaşlıq münasibətlərinin daha da yüksək səviyyədə bərqərar olunması, xüsusən, Qafqazda sülh və stabilliyin möhkəmləndirilməsi yönündə xidmətlərini müstəsna dəyərləndirir. Diplomat Rusiya dövlət başçısının Bakı sammiti çərçivəsində baş tutmuş Rusiya, Azərbaycan və Ermənistan dini liderlərinin üçtərəfli görüşünə yüksək dəyər verdiyini Şeyxülislam Hacı Allahşükür Paşazadənin diqqətinə çatdırıb.

Türkiyənin Azərbaycandakı səfiri Hülusi Kılıcla Şeyxülislamın görüşü zamanı Azərbaycan və Türkiyə arasında dini-mənəvi əlaqələrin daha da yüksəldilməsi perspektivləri müzakirə olunub.