Din

Ana səhifə

Din

Azərbaycan prezidentinin təşəbbüsü və dəstəyi ilə çap olunmuş “Qurani-Kərim”in təqdimatı keçirilib

16 avqust 2010 15:32 (UTC +04:00)

APA-nın məlumatına görə, tədbirdə Dini Qurumlarla İş üzrə Dövlət Komitəsinin sədri Hidayət Orucov, ziyalılar, mədəniyyət və incəsənət xadimləri, millət vəkilləri, dini icma rəhbərləri iştirak edib.

H. Orucov deyib ki, “Qurani-Kərim”in bu tərtibatda çap olunaraq işıq üzü görməsi Azərbaycanın milli kitab mədəniyyəti tarixində çox əlamətdar hadisədir. O, kitabın Azərbaycan prezidentinin təşəbbüsü və dəstəyi ilə Türkiyədəki xüsusi bir mətbəədə çap olunduğunu açıqlayıb. Komitə sədri qeyd edib ki, xüsusi texnologiya əsasında aşılanmış dəri ilə cildlənmiş kitabın üz qabığı Swarovski daşları ilə bəzədilib, səhifələri kalliqrafik naxışlarla səliqəli çərçivəyə salınıb. Tirajın hər nüsxəsi yüksək zövqlə hazırlanıb və əl işi ilə tamamlanmış qızılı rəngli qutuya yerləşdirilib. “Qurani-Kərim”in futlyarında “Azərbaycan Respublikasının prezidenti İlham Əliyevin hədiyyəsi” sözləri yazılıb. H. Orucovun sözlərinə görə, yeni işıq üzü görmüş kitabın hədiyyə ediləcəyi şəxslərin siyahısı Dini Qurumlarla İş üzrə Dövlət Komitəsi tərəfindən Prezident Administrasiyasına göndərilib. Administrasiyada həmin siyahıya baxılıb, prezidentə məruzə edilib və təsdiqlənmiş siyahı əsasında yeni “Qurani-Kərim”in ölkə ziyalılarına, dindarlara Azərbaycan prezidenti adından hədiyyə olunmasına başlanılıb.

Tədbirdə iştirak edən Qafqaz Müsəlmanları İdarəsi (QMİ) sədrinin I müavini Hacı Salman Musayev, akademik Budaq Budaqov, millət vəkili Gövhər Baxşəliyeva, Memarlıq və İnşaat Universitetinin rektoru Gülçöhrə Məmmədova, İçərişəhər Cümə Məscidinin axundu Hacı Surxay Məmmədli və digər şəxslər müqəddəs Ramazan ayında verilən belə bir hədiyyəyə görə prezident İlham Əliyevə təşəkkür ediblər.