Din

Din

Qafqaz Müsəlmanları İdarəsi müqəddəs Həcc ziyarəti mövsümünün başlanması ilə əlaqədar açıqlama yayıb

03 noyabr 2010 09:06 (UTC +04:00)

Bakı. Pərvin Abbasov – APA. Qafqaz Müsəlmanları İdarəsi (QMİ) bu ilin müqəddəs Həcc ziyarəti mövsümünün başlanması ilə əlaqədar açıqlama yayıb. QMİ-nin mətbuat xidmətindən APA-ya daxil olan açıqlamada idarənin Azərbaycandan müqəddəs Həcc ziyarətini təşkil edən mərkəz olaraq, ziyarət səfərlərini Səudiyyə Ərəbistanının Həcc Nazirliyi ilə imzalanmış protokol əsasında həyata keçirdiyi qeyd olunub. Bildirilib ki, 2010-cu ildə Azərbaycandan Həcc ziyarətinə ölkəmiz üçün nəzərdə tutulan kvotaya uyğun olaraq, 2 min nəfər zəvvar yola düşür. Onlardan 1200 nəfəri avtobuslarla, 800 nəfər isə təyyarələrlə müqəddəs məkanlara səfər edir. Avtobuslar Azərbaycan-Gürcüstan-Türkiyə-Suriya-İordaniya-Səudiyyə Ərəbistanı marşrutu ilə, təyyarələr isə Bakı-Ciddə reysi üzrə hərəkət edirlər. Avtobusla gedən zəvvarlar 2 və 3 noyabr tarixlərində 46 avtobusdan ibarət iki avtobus karvanı ilə artıq yola düşüblər. 4 təyyarə ilə ziyarətə gedənlər 2, 3, 4 və 5 noyabr tarixlərində hər gün bir reys olmaqla səfərə yollanırlar.

Ziyarət səfərləri avtobuslarla 2500 manat, təyyarə ilə səfər edənlər üçün isə 3500 manat dəyərindədir. Bu məbləğə zəvvarların nəqliyyat, mehmanxana, viza xərcləri, torpaqbasdı vergisi, çadırların icarə haqqı, sığorta xərci və səfər müddətində gündə 2 dəfə qidalanma xərcləri daxildir.

Ziyarət səfəri zamanı zəvvarların təhlükəsizliyi ilə bağlı lazımi tədbirlər QMİ ilə Səudiyyə Ərəbistanı hökuməti arasında imzalanmış protokolun müvafiq müddəalarına əsasən həyata keçirilir. Zəvvarları səfər müddətində müqəddəs ziyarətin özəllikləri ilə bağlı məlumatlandıran qrup rəhbərləri, səhhətlərinə nəzarət edəcək həkim briqadaları müşayiət edir. Ümumilikdə, təşkilati məsələlər nəzarət edən şəxslər, həkim briqadası, sürücülər və müşayiət edənlərlə birlikdə Azərbaycandan bu il Səudiyyə Ərəbistanına 2300 nəfərdən ibarət missiya yola düşür.
Hazırda Mədinə şəhərinin hava limanında aparılan təmir və genişləndirmə işləri ilə bağlı çarter reysi həyata keçirən təyyarələr əvvəlcədən nəzərdə tutulduğu kimi, Mədinədə deyil, Ciddə aeroportunda enirlər. Buradan zəvvarlar avtobuslarla Mədinə şəhərinə aparılacaqlar. Buranı 3 gün ərzində ziyarət edən zəvvarlar Həcc əməllərini yerinə yetirmək üçün avtobuslarla Məkkəyə yollanacaqlar. Ümumilikdə, müqəddəs Həcc səfərinin müddəti 20-25 gündür.

Qeyd olunub ki, Səudiyyə Ərəbistanı dövlətinin qanunlarına görə, Həcc mövsümü müddətində təyyarə ilə səfər edən zəvvarlar uçuşa 8-12 saat qalmış hava limanında olmalıdırlar. İslam dünyasının çoxmilyonlu zəvvarlarının eyni günlərdə Ciddə Hava Limanında eniş-uçuş həyata keçirəcəklərini nəzərə alsaq, təyyarələrin uçuş vaxtlarında müəyyən gecikmələrin ola biləcəyi istisna edilmir: “Azərbaycanlı zəvvarların çarter uçuşlarını Fransanın tanınmış hava nəqliyyatı şirkəti həyata keçirəcək və ümidvarıq ki, inşallah, bu məsələdə problemlər minimum səviyyədə olacaq. Ümumilikdə, Həcc mövsümü ərzində təyyarə reyslərinin sıxlığı səbəbindən uçuş vaxtlarının müəyyən qədər ertələnməsi adi haldır”.