Din

Din

İsrail Musayev: ““Alma” qəzetində gedən yazıdakı karikatura ilə bağlı baş redaktorun adından üzr istəmişəm”

04 noyabr 2010 13:28 (UTC +04:00)

Bakı. Ramil Məmmədli-APA. ““Alma” qəzetində gedən yazıdakı karikatura ilə bağlı baş redaktorun adından üzr istəmişəm”.

Bunu APA-ya açıqlamasında “Alma” qəzetinin baş redaktoru İsrail Musayev deyib. O bildirib ki, karikaturanın qəzetdə getməsi texniki səhv olub: “Mən qəzet çıxan vaxt orada olmamışam və bu karikatura elmi yazının fotosu kimi gedib. Bir sözlə hadisə məqsədli şəkildə olmayıb. Ancaq nədənsə, üzr istəməyimə də fikir vermirlər”.

İ. Musayev qeyd edib ki, ona xüsusi olaraq təzyiq olmayıb: “Amma Azərbaycanda fəaliyyət göstərən İslam yönümlü internet xəbər resurslarının hamısında mənim ünvanıma kampaniya başlayıb. Cəmiyyətin digər, inkişaf etmiş və elmi dəyərləndirən hissəsindən müdafiə görüb-görməyəcəyimi isə bilmirəm. Ancaq hesab edirəm ki, bütün bunlara baxmayaraq, nə din, nə də türkçülük bu millətə kömək etməyəcək. Dünya xalqlarının bir çoxu bu mərhələni keçib və həyat tərzləri gözümüzün qarşısındadır. Elmdən başqa heç nə bu millətə kömək etməyəcək. Özümü Mirzə Fətəli Axundovla müqayisə etmək istəmirəm. Ancaq acı reallıqdır ki, Axundovun nəşini yerdən 6 hambal götürüb. Həqiqətə və elmə münasibəti mənim kimi olanların aqibəti Axundov kimi olacaq”.

Qeyd edək ki, Qafqaz Müsəlmanları İdarəsi (QMİ) və Azərbaycan İslam Partiyası (AİP) “Alma” qəzetində İslam Peyğəmbərinin (s) təhqir olunması ilə bağlı Azərbaycan Mətbuat Şurasına müraciət edib.