Din

Din

İlqar İbrahimoğlu: “Ölkənin təhsil müəssisələrində hicaba kütləvi şəkildə qadağa qoyulması ilə bağlı problem yoxdur”

23 noyabr 2010 12:29 (UTC +04:00)

Bakı. Ramil Məmmədli - APA. Dini Etiqad və Vicdan Azadlıqlarının Müdafiə Mərkəzinin (DEVAMM) sədri Hacı İlqar İbrahimoğlu orta məktəblərdə hicablı şagirdlərin təhsil almasına yaradılan maneələrlə bağlı mətbuat konfransı keçirib.

APA-nın məlumatına görə, İ. İbrahimoğlu deyib ki, hər dəfə təhsil ilinin əvvəlində hicabla bağlı həm orta, həm də ali məktəblərdə problemlər yaradılır. O bununla bağlı monitorinqin keçirildiyini və mütəmadi maarifləndirmə işlərinin aparıldığını bildirib: “Bu ay Bakının bir neçə məktəbində belə problem olub. Lakin Təhsil Nazirliyi səviyyəsində hicaba təhsil müəssisələrində məhdudiyyət qoyulması haqda hansısa tapşırığa rast gəlinməyib”. İ. İbrahimoğlu qeyd edib ki, təhsil naziri Misir Mərdanov 10 il ərzində hicablı qadınların təhsil müəssisələrində hüquqlarının qorunması istiqamətində zəruri addımlar atıb: “Misir Mərdanov təhsil naziri kimi hicablı qadınların hüquqlarını qoruyub. Biz insan hüquqlarının qorunması baxımından bunu qiymətləndiririk. Misir Mərdanovun özü də çıxışlarında deyib ki, onun təhsil naziri olduğu dövrdə məktəblərdə hicabla bağlı məhdudiyyət olmayacaq. Misir Mərdanovun mətbuatda gedən fikirlərində də məsələ hicaba qadağadan deyil, vahid məktəbli geyimindən gedir”.

İ. İbrahimoğlu deyib ki, hazırda ölkənin təhsil müəssisələrində hicaba kütləvi şəkildə qadağa qoyulması ilə bağlı problem yoxdur: “Ümid edirik ki, Avropa və bir sıra ölkələrdə olduğu kimi, Azərbaycanda da bu məsələ həllini tapacaq”.

Misir_Mərdanov