Din

Din

Gürcüstan Patriarxlığı Qafqaz Müsəlmanları İdarəsinin 1823-1918-ci illəri əhatə edən arxivinin surətlərini Azərbaycana təhvil verəcək

20 dekabr 2010 13:20 (UTC +04:00)

APA-nın Gürcüstan bürosunun məlumatına görə, tədbirdə çıxış edən II İlya Hacı Allahşükür Paşazadəni yaxşı tanıdığını, Sovetlər dönəmində konfranslarda və digər dini tədbirlərdə birlikdə sülhü qorumaq üçün çalışdıqlarını bildirib: "Biz çətin zəmanədə yaşayırıq. İndi Qafqazda sülh yoxdur. Buna görə də sizin gəlişinizi biz çox yüksək qiymətləndiririk. Qafqazda və Şimali Qafqazda illərlə yığılıb qalan problemlər öz həllini tapmalıdır. Baş verən hadisələr çox dəhşətli və gözlənilməz hadisələrə gətirib çıxara bilər. Biz tez-tez görüşməliyik. Biz sizin gəlişinizə həmişə şadıq. Xahiş edirəm Azərbaycan prezidentinə mənim səmimi salamlarımı və xoş arzularımı çatdırasınız."

Sonra Qafqaz Müsəlmanları İdarəsinin sədri Hacı Allahşükür Paşazadə Azərbaycan və Gürcüstanın çətin və ağır günlərdə, sevinc və kədəri birgə bölüşdüyünü deyib: “Bu gün Qafqazda ağsaqqal sözünə ehtiyac var. Sizin şəxsinizdə bunu görürəm. Sizin dəfələrlə Bakıya gəlişinizin, Heydər Əliyevlə və İlham Əliyevlə və onun xanımı Mehriban Əliyeva ilə görüşlərinizi yaxşı xatırlayıram. Mənim 60 illik yubileyimizdə iştirakınız sanki mənim başıma tac qoydunuz".

Hacı Allahşükür Paşazadə Azərbaycanın və Gürcüstanın torpaqlarının işğal olunduğunu, ölkələrin ərazi bütövlüyünün pozulduğunu deyib: "Bu gün ağrılarımız da bir-birinə oxşayır. Mənfur düşmənlər gürcü və Azərbaycan xalqlarına problemlər yaradırlar. Qafqazda sülhü təşkil etmək üçün çox iş görmək lazımdır. Torpaqlarımızın ərazi bütövlüyünü bərpa etmək üçün biz tez-tez görüşməliyik. Bu görüşlər vacibdir. Biz din adamıyıq. Sülh yolu ilə bu məsələlərin həllinə çalışmalıyıq. Hesab edirəm ki, Azərbaycan prezidenti İlham Əliyev və Gürcüstan prezidenti Mixail Saakaşvili bizi narahat edən məsələdə sülh yolunu axtarırlar, biz də bir din xadimləri kimi onlara əlimizdən gələn köməyi göstərməliyik".

Sonra QMİ sədri Gürcüstan patriarxı II İlyaya onun portreti çəkilmiş xalça bağışlayıb. II İlya isə Hacı Allahşükür Paşazadəyə yaraşıqlı güldan hədiyyə edib.

Tədbirdə II İlya Azərbaycanın Gürcüstandakı səfiri Namiq Əliyevə Gelati Akademiyasının üzvü seçilməsi münasibətilə diplom təqdim edib. Azərbaycan səfiri onu Gelati Akademiyasına üzv seçdikləri üçün II İlyaya təşəkkür edib: "Bu bizim xalqlarımız arasında olan dostluğa verilən qiymətdir. Bu diplom mənim üçün fəxrdir və mən harada olsam da xalqlarımızın dostluğunun inkişafına çalışacağam".

Sonra hər iki din xadimi jurnalistlərin suallarını cavablandırıblar. II İlya Dağlıq Qarabağ münaqişəsinə münasibətini açıqlayıb: “Hesab edirəm ki, münaqişələr bir-birinə oxşayır". II İlya jurnalistlərə 1823-1918-ci illəri əhatə edən QMİ arxivinin surətlərini də Azərbaycana təhvil verəcəyini bildirib.

Tədbirdə Gürcüstan parlamentinin sədr müavini Fridon Todua, Azərbaycan və Gürcüstan parlamentlərinin deputatları, iki ölkənin din xadimləri iştirak ediblər.