Din

Din

Azərbaycanın Dövlət Komitəsi: Ölkəmizi kənardan idarə etmək istəyənlər və aramızda kənardan idarə olunanlar var

19 yanvar 2011 14:46 (UTC +04:00)

Bunu APA-ya açıqlamasında dövlət qeydiyyatı olmadan fəaliyyət göstərən Azərbaycan İslam Partiyasının Baş Məclisinin üzvü Kərbəlayi Natiq Kərimov deyib.

N. Kərimov Qafqaz Müsəlmanları İdarəsinin (QMİ) Qazılar Şurasının Qurban, Ramazan bayramlarında, Məhərrəm ayının başlanması ilə əlaqədar verdiyi fətvaların isə təxminən 80 faizinin şəriətə uyğun olmadığını iddia edib: “Əvvəla həmin Qazılar Şurası analiz olunmalıdır ki, kimlərdən ibarətdir. Onların bu vaxta qədər verdikləri fətvaların çoxu, bəlkə də 80 faizi heç bir şəriətə uyğun olmayıb”.

N. Kərimov QMİ sədri Hacı Allahşükür Paşazadənin Şeyxülislamlığını da qəbul etmədiklərini deyib: “Şəriət hökmlərində onun Şeyxülislam statusunu qəbul etmirəm”.

Qafqaz Müsəlmanları İdarəsinin mətbuat xidmətindən N. Kərimovun açıqlamasını şərh etmək istəməyiblər.

Məsələ ilə bağlı Dini Qurumlarla İş üzrə Dövlət Komitəsinin (DQİDK) mətbuat xidmətinin rəhbəri Saleh Aslanov isə APA-nın sorğusuna cavab olaraq deyib ki, Azərbaycanda şəri məsələlərə dövlət müdaxilə etmir: “Lakin dini fəaliyyət sahəsi qanunvericiliklə tənzimlənir. “Dini etiqad azadlığı haqqında” qanuna əsasən, ölkədəki İslam təmayüllü dini icmaların hamısı təşkilati baxımdan Qafqaz Müsəlmanları İdarəsinə tabedirlər. İstər ölkə daxilində, istərsə də ölkə xaricində heç kim və heç bir qurum, statusundan asılı olmayaraq, QMİ-nin qanundan irəli gələn bu hüququnu mənimsəyə bilməz. Bu isə o deməkdir ki, İslam təmayüllü dini icmalar QMİ-nin öz səlahiyyətləri çərçivəsində çıxardığı qərar və fətvalara əməl etməyə borcludurlar.

O ki qaldı məsələnin digər tərəfinə, hamı bilməlidir ki, Azərbaycan Bakıdan idarə olunur. Ancaq ölkəmizi kənardan idarə etmək istəyənlər və aramızda kənardan idarə olunanlar var. Bizimlə onların fərqi də bax elə budur”.

din