Din

Din

Allahşükür Paşazadə Fransa və Avstriyanın Azərbaycandakı səfirlərini qəbul edib

14 fevral 2011 15:01 (UTC +04:00)

Bakı. Pərvin Abbasov – APA. Bu gün Qafqaz Müsəlmanları İdarəsinin (QMİ) sədri Şeyxülislam Allahşükür Paşazadə Fransanın Azərbaycandakı səfiri Qabriel Kelleri onun xahişi ilə qəbul edib. Bu barədə APA-ya QMİ-nin mətbuat xidmətindən məlumat verilib.
Səfir Şeyxülislam A. Paşazadə ilə Azərbaycan və Fransa arasında mənəvi əlaqələrin mövcud vəziyyəti, perspektivləri ətrafında müzakirə aparıb, ölkəsinin bu əlaqələrin gələcəkdə daha da inkişaf etdirilməsində maraqlı olduğunu QMİ sədrinin diqqətinə çatdırıb.

Şeyxülislam Fransada iştirak etdiyi konfranslar, burada tanış olduğu nüfuzlu din xadimləri, habelə dinlərarası dialoq sahəsində QMİ-nin YUNESKO ilə əməkdaşlıq əlaqələri barədə səfiri məlumatlandıraraq, gələcəkdə Fransanın xristian və müsəlman din xadimlərinin Azərbaycana səfərlərinin əhəmiyyətli olacağını xüsusi vurğulayıb.
A. Paşazadə Fransa səfirinə xatirə hədiyyəsi təqdim edib.

Bu gün QMİ sədri, həmçinin Avstriyanın Azərbaycandakı səfiri Silviya Mayer-Kaybiçi onun öz xahişi ilə qəbul edib. Səfirə Avstriyaya səfərləri, konfranslarda iştirakı zamanı yerli müsəlmanlarla, avstriyalı din xadimləri ilə görüşləri barədə məlumat verən A.Paşazadə bu əlaqələrin xalqlar arasında dini-mənəvi əlaqələrin inkişafına töhfə verdiyini vurğulayıb. A. Paşazadə Avstriya səfirinə xatirə hədiyyəsi təqdim edib.

Allahşükür_ Paşazadə