Din

Din

QMİ-nin Gürcüstan nümayəndəsi: “Tarixən Gürcüstanda yaşayan müsəlmanlar həmişə Qafqaz Müsəlmanları İdarəsinə bağlı olublar”

13 may 2011 12:05 (UTC +04:00)

Qafqaz Müsəlmanları İdarəsinin Gürcüstan nümayəndəsi Hacı Əli Əliyev APA-nın Gürcüstan bürosuna açıqlamasında bunu QMİ əleyhinə atılan addım kimi qiymətləndirib: “Tarixən Gürcüstanda yaşayan müsəlmanlar həmişə Qafqaz Müsəlmanları İdarəsinə bağlı olublar. Bu təşkilatın yaradılması QMİ-nin əleyhinə atılan yanlış bir addımdır. Hətta deyə bilərəm ki, bu, Gürcüstan dövlətçiliyinə uyğun olmayan bir əməldir. Ümidvaram ki, bu problem həll olunacaq. Mən Qafqaz Müsəlmanları İdarəsinin Gürcüstan nümayəndəsi olaraq belə bir qurumun yaradılmasının əleyhinəyəm”.

Hacı Əli deyib ki, bu qurum Gürcüstan müsəlmanlarını idarə edə bilməyəcək: “Nizamnamədə göstərilir ki, azərbaycanlı müsəlmanlar istədikləri kimi qərar verə bilməyəcəklər, axund, molla təyin edə bilməyəcəklər, hətta məscidə xadimə də götürə bilməyəcəklər. Təyinatlara yalnız Batumi müftisi imza atmalıdır. Üç-beş nəfər dindar və ya hökumət adamı müsəlmanların taleyini həll edə bilməz. Bu təşkilatı yaradanlar sabah səhv addım atacaqlarını başa düşəcəklər”.

“Gürcüstan Müsəlmanları İdarəsi” qeyri hökumət təşkilatının təsisçilərindən biri, Kvemo-Kartli bölgə qubernatorunun müavini Hüseyn Yusifov isə bəyan edib ki, bu təşkilat QMİ-nin Gürcüstan nümayəndəliyinin əleyhinə deyil: “Bu, qeyri-hökumət təşkilatıdır. Digər azərbaycanlılar kimi, mən və parlamentin deputatı Azər Süleymanov da qurumun təsisçiləriyik. Bu təşkilat ondan ötrüdür ki, məscidlərimizin dövlət qeydiyyatından keçməsinə kömək etsin. Bu, şeyxülislam institutuna alternativ deyil. Gürcüstanda yüzlərlə QHT var, biri də budur. Təşkilatın Acarıstan filialı da var. Acarıstan müsəlmanları o filiala tabe olacaq. Rəhbəri də müfti Camal Paksadzedir. O, həm sünni, həm də şiə məzhəbinin rəhbəri olaraq seçilib. Kvemo-Kartli müsəlmanları isə hələlik özlərinin Nizamnaməsi üzərində işləyirlər. Onlar da bu təşkilata rəhbər seçəcəklər. Camal Paksadze yalnız Acarıstan bölməsinə rəhbər seçilib. Nizamnaməyə görə, azərbaycanlı müsəlmanların öz şeyxi olacaq. Sünni və şiələr ona tabe olacaq. Sədrin sünni və şiə məzhəbindən müavinləri seçiləcək”.

H. Yusifov Gürcüstan dövlətinin bu təşkilatın yaranmasına pis baxmadığını da açıqlayıb: “Bizim məscidlər dövlət reyestrində yoxdur. Dövlət deyir ki, sənədləri təqdim edin, biz məscidləri təsdiq edək. Yeni yaranan təşkilat məscid tikintisi və məscidlərin qeydiyyata alınması barədə müxtəlif layihələr təqdim edəcək, hökumət də təsdiqləyəcək. Gürcüstan qanunvericiliyində din sahəsi ilə bağlı boşluqlar var. Xristian dini ilə əlaqəli qanunlar işlənib hazırlanıb. Lakin gürcülər qorxularından müsəlmanlarla bağlı qanunlar qəbul edə bilmirlər ki, birdən səhv edərlər və müsəlmanların xoşuna gəlməz. Yeni yaranmış təşkilatda Elmi Şura da fəaliyyət göstərəcək. Bu təşkilat həmin boşluqlar üzərində işləyəcək”.