Din

Din

Bakıda Qafqaz Xalqları Ali Dini Şurasının hesabat konfransı keçirilib

16 may 2011 12:13 (UTC +04:00)

APA-nın xəbərinə görə, konfransda çıxış edən Qafqaz Müsəlmanları İdarəsinin sədri, şeyxülislam Allahşükür Paşazadə Qafqazda sülhün millətlərarası və dinlərarası anlaşma və əməkdaşlıqdan keçdiyini bəyan edib: “Biz əminik ki, ekstremistlərin, terrorçu qrupların fiziki və mənəvi təcavüz planlarının qarşısını dövlət rəhbərləri, ictimai-siyasi xadimlərlə dini birliklərin birgə fəaliyyəti sayəsində almaq olar”.

A. Paşazadə bildirib ki, son vaxtlar Qafqazda baş verənlər din xadimlərini narahat edir, regionda hələ də qanlı terror aksiyaları baş verir və bəzən dini liderlər bunun qurbanı olur. Şeyxülislam hesab edir ki, yalnız qarşılıqlı əməkdaşlıq şəraitində ekstremizm və terrorçuluğun kökünü kəsmək mümkündür. O, çıxışında Dağlıq Qarabağ münaqişəsini Azərbaycanın əsas problemi kimi səciyyələndirib və deyib ki, bu münaqişə Azərbaycanın ərazi bütövlüyü, qaçqın və məcburi köçkünlərin öz doğma yurdlarına qayıtması nəticəsində həll olunmalıdır.

Çeçenistan müftisi şeyx Soltan Mirzəyev isə qeyd edib ki, hazırkı mərhələdə Qafqazın din xadimlərinin əsas məqsədlərindən biri gəncləri radikal dini cərəyanlardan qorumaqdır. Onun sözlərinə görə, işsizlik və digər sosial problemlərdən istifadə edən ifrat dini qruplaşmalar gəncləri öz sıralarına cəlb etmək istəyirlər: “Bu, çox təhlükəli bir tendensiyadır. Ona görə də Qafqazın ənənəvi dinlərinin xadimləri maarifləndirməni və gənclərlə işi gücləndirməlidirlər. Biz gənclərin yanına gedib geniş izahat işləri aparmalıyıq”.

Gənclərlə maarifləndirici işin vacibliyi ilə Adıgey müftisi Nurbiy Yemij də razılaşıb. O bildirib ki, Sovet İttifaqı süquta uğradıqdan bəri qeyri-ənənəvi dini cərəyanlar və ifrat qruplaşmalar Qafqazda öz mövqelərini möhkəmləndirməyə çalışırlar: “Bu, Qafqazda sülh və əmin-amanlıqla bir araya sığmır, çünki həmin dairələr separatçılıq və fitnə-fəsad törətməklə məşğuldurlar”.

Qaraçay-Çərkəz müftisi İsmayıl Berdıyev isə dini əmin-amanlıq məsələsində Azərbaycanın örnək bir ölkə olduğunu vurğulayıb.

Toplantının sonunda şura üzvləri BMT-yə birgə müraciət qəbul ediblər.

bakı_qafqaz