Din

Ana səhifə

Din

Rəhimə Dadaşova: “QMİ dini mərkəz kimi dövlət qeydiyyatından keçib, digər QHT-lərin ona hesabat verməsi təbiidir”

03 iyun 2011 14:56 (UTC +04:00)

Bunu APA-ya açıqlamasında Qafqaz Müsəlmanları İdarəsinin (QMİ) mətbuat xidmətinin rəhbəri Rəhimə Dadaşova “Dini etiqad azadlığı haqqında” qanuna təklif edilən dəyişikliklər barədə tənqidi fikirlərə münasibət bildirərkən deyib. O, “QMİ də QHT-dir. Digər dini icmalar başqa bir icmaya – QMİ-yə necə hesabat verə bilər?” kimi fikirlərlə qəti şəkildə razılaşmadığını bildirib: “Qafqazın müsəlman dini icmaları tarixi din mərkəzi olan Qafqaz Müsəlmanları İdarəsində birləşirlər. Bu baxımdan da müsəlman icmalarının öz tarixi mərkəzlərinə hesabat vermələrində qeyri-təbii nəsə axtarmaq doğru deyil”.

R. Dadaşova QMİ-nin bütövlükdə “Dini etiqad azadlığı haqqında” qanuna təklif edilən dəyişikliklərə münasibətinin normal olduğunu da deyib: “Bunlar reallığı nəzərə alan, reallığı özündə əks etdirən təkliflərdir və ümumi işin xeyrinə olacaq”.

Milli Məclisin İnsan haqları komitəsinin sədri Rəbiyyət Aslanova isə APA-ya deyib ki, “Dini etiqad azadlığı haqqında” qanuna təklif edilən dəyişikliklər zərurətdən yaranıb: “Qafqaz Müsəlmanları İdarəsinin QHT olmasında gəlincə, bu qurum böyük bir tarixi mərkəzdir. Qafqaz Müsəlmanları İdarəsi XIX əsrdə yaranmış, böyük bir ərazidə təsir qüvvəsi olan mərkəzdir. Bu mərkəz SSRİ vaxtında sovetlərin siyasi təbiətindən irəli gələn tələblərlə bağlanmışdı. 1946-cı ildə - hələ Sovetlər dönəmində isə Qafqaz Müsəlmanları Ruhani İdarəsi mərkəz kimi açıldı. Azərbaycan müstəqil olduqdan sonra - 1992-ci ildə “Dini etiqad azadlığı haqqında” qanun qəbul olundu. Artıq din və dövlət münasibətlərinin 20 illik tarixi var. Bu 20 illik tarix ərzində sözsüz ki, bu məsələlərə də zaman öz korrektəsini edib. O vaxt qanun qəbul ediləndə, QMİ bərabər hüquqlu bir icma kimi qəbul edilmişdi. Ancaq 2009-cu ildə “Dini etiqad azadlığı haqqında” qanuna dəyişiklik etdik və göstərdik ki, digər dini icmalara din xadimləri QMİ-nin təqdimatı ilə təyin olunur. Bir halda ki, təyinat QMİ-nin təqdimatı ilə olur, icmalar hesabatı da həmin mərkəzə – QMİ-yə verməlidir. Çünki QMİ həmin dini icmalara görə məsuliyyət daşıyır”.

Mətbuatda dini ekspertlərin verdiyi “Digər dini icmaların QMİ-yə hesabat verəcəyi halda QMİ hansı quruma hesabat verəcək?” kimi suallarına isə R. Aslanova belə cavab verib: “Qafqaz Müsəlmanları İdarəsinin rəhbəri Allahşükür Paşazadədir. Allahşükür Paşazadə Qazılar Şurasının qarşısında hesabat verir. O, qurultayda seçilir, qurultayda da fəaliyyəti haqqında hesabat verir. Azərbaycanın sayılan, tanınmış din xadimlərindən ibarət Şuraya hesabat verilir. Bu, sırf demokratik prinsipdir”.

din