Din

Din

Qafqaz Müsəlmanları İdarəsində Həzrəti Əlinin mövludu və Qurtuluş günü münasibəti ilə tədbir keçirilib

15 iyun 2011 09:17 (UTC +04:00)

APA-nın məlumatına görə, tədbirdə QMİ sədri, Şeyxülislam Allahşükür Paşazadə, Dini Qurumlarla İş üzrə Dövlət Komitəsinin sədri Hidayət Orucov, Bakının və Xəzəryanı bölgənin yepiskopu Aleksandr Ata, digər din və elm xadimləri iştirak edib.

Tədbir “Qurani-Kərim”-dən surələrin oxunması ilə başlayıb. Allahşükür Paşazadə “Qurani-Kərim”dən surələri oxuyanın Bakı İslam Universitetinin tələbəsi olduğunu deyərək bunu sevindirici fakt kimi vurğulayıb. O, Həzrəti Əlinin (ə.) mövludu günü münasibətilə dünya və Qafqaz müsəlmanlarını təbrik edib. Şeyxülislam Həzrəti Əlinin (ə.) İslam dinində tutduğu mövqedən danışıb. A. Paşazadə Qarabağ münaqişəsi ilə bağlı ölkə rəhbərinin apardığı siyasətin sülh və uğurla başa çatması üçün dua edib. O, 15 iyun – Qurtuluş günü barədə də danışaraq deyib ki, Heydər Əliyev Azərbaycanı parçalanmadan qurtarıb: “Mən həmin hadisələrin şahidlərindən biri kimi də bilərəm ki, ölkə 1993-cü ildə dini və milli parçalanma ərəfəsində idi. Heydər Əliyev buna imkan vermədi”.

Dini Qurumlarla İş üzrə Dövlət Komitəsinin sədri Hidayət Orucov böyük mütəfəkkir Həzrəti Əlinin (ə.) İslam sivilizasiyasına daxil olaraq Böyük Əli obrazını yaratdığını söyləyib. O deyib ki, Həzrəti Əli (ə.) bütün dünya müsəlmanları üçün böyük sədaqətin, comərdliyin, insani dəyərləri özündə təcəssüm etdirən bir şəxsiyyətdir. O, İslam Peyğəmbərinin (ə.s.) Həzrəti Əliyə (ə.) böyük önəm verdiyini də vurğulayıb.

H. Orucov deyib ki, bu il Həzrəti Əlinin (ə.) mövludu ilə Qurtuluş gününün eyni günə düşməsində təsadüfdən məntiqi bağlılıq axtarmaq lazımdır. O, 1993-cü ilin iyun ayında baş verən hadisələrdən danışaraq Heydər Əliyevin xalqın istəyi ilə hakimiyyətə gəldiyini vurğulayıb. Komitə sədri Heydər Əliyevin din sahəsindəki rolundan da danışıb: “Heydər Əliyev dini fəaliyyət üçün bütün imkanları yaradırdı”.

Tədbirdə akademik Hacı Vasim Məmmədəliyev və başqaları da çıxış edib.