Din

Ana səhifə

Din

“Dini Qurumlarla İş üzrə Dövlət Komitəsi: 10 il” mövzusunda dəyirmi masa keçirilib

21 iyun 2011 10:33 (UTC +04:00)

Bakı. Pərvin Abbasov – APA. Dini Qurumlarla İş üzrə Dövlət Komitəsində (DQİDK) “Dini Qurumlarla İş üzrə Dövlət Komitəsi: 10 il” mövzusunda dəyirmi masa keçirilib. APA-nın məlumatına görə, tədbirdə komitə sədri Hidayət Orucov, Qafqaz Müsəlmanları İdarəsinin (QMİ) sədri Şeyxülislam Allahşükür Paşazadə, dini icmaların rəhbərləri və digər şəxslər iştirak edib.

DQİDK sədri Hidayət Orucov rəhbərlik etdiyi qurumun fəaliyyəti və gördüyü işlərdən danışıb. Hazırda ölkədə dini durumun sabit olduğunu deyən H. Orucov dövlət komitəsi sədrinin yanında təşkil olunmuş və ölkənin əsas dini konfessiya rəhbərlərindən ibarət Məşvərət Şurasının fəaliyyətinə diqqət çəkib. Belə ki, şurada dinlərarası dialoq üslubunda dini durumla bağlı məsələlər müzakirə edilir, məsləhətləşmələr aparılır, dini radikalizm, ekstremist meyllər, bir sözlə, dini duruma neqativ təsirlərin aradan qaldırılması istiqamətində mütəxəssislərin mövqeləri dəqiqləşdirilir.

QMİ sədri Allahşükür Paşazadə Azərbaycanda dini tolerantlığın mövcud olduğunu söyləyib. O, DQİDK ilə dini icmaların münasibətlərinin yaxşı səviyyədə olduğunu bildirib.

Tədbirdə Bakının və Azərbaycanın yepiskopu Aleksandr ata, “Bakı Dağ Yəhudiləri” dini icmasının sədri Semeon İxiilov və digərləri də Azərbaycanın tolerant bir ölkə olduğunu vurğulayıblar.

Sonda dəyirmi masa iştirakçıları adından Azərbaycan prezidenti İlham Əliyevə müraciət qəbul olunub. Müraciətdə görülən işlər və qarşıya çıxan problemlərlə bağlı məlumat verilib və göstərilən dəstəyə görə ölkə rəhbərliyinə təşəkkür edilib.