Din

Din

Qafqaz Müsəlmanları İdarəsində toy və yas mərasimlərində israfçılıq müzakirə olunub

13 iyul 2011 13:01 (UTC +04:00)

APA-nın məlumatına görə, QMİ sədri Allahşükür Paşazadə mövzunun əhəmiyyətindən danışaraq yas və toy mərasimlərində israfçılıq hallarının olduğunu, bunun islam dini ilə ziddiyyət təşkil etdiyini deyib. Tədbirdə dəyirmi masa iştirakçıları adından QMİ Qazılar Şurası və Elmi-Dini Şurasına müraciət səsləndirilib.

Çıxış edən millət vəkili Fəttah Heydərov bildirib ki, bu müraciət vaxtında edilib. O qeyd edib ki, toy və yas mərasimləri ilə bağlı problemlər daim müxtəlif tədbirlərdə müzakirə olunsa da, indiyədək konkret addım atılmayıb.

AMEA Tarix İnstitutunun direktoru Yaqub Mahmudov da israfçılığı pisləyib və bu məsələ ilə bağlı QMİ-nin fətva verməsinə ehtiyac olduğunu vurğulayıb. O, şeyxülislam Allahşükür Paşazadənin müqəddəsləşdirilməsinin vacib olduğunu da əlavə edib.

Böyük Quruluş Partiyasının (BQP) sədri Fazil Mustafa Y. Mahmudovun təklifi ilə razılaşmayıb. Onun fikrincə, mərasimlərlə bağlı məsələdə fətva həlledici rol oynaya bilməz: “Ən yaxşısı o olardı ki, tanınmış adamlar sadə insanlara nümunə göstərsin. Fətva çıxış yolu deyil”. F. Mustafa şeyxülislamın müqəddəsləşdirilməsinin də əleyhinə çıxıb və deyib ki, müqəddəslik yalnız Allaha məxsusdur.

Tədbirdə Ağsaqqallar Şurasının sədri, akademik Budaq Budaqov, rejissor Ramiz Əzizbəyli, xalq şairi Zəlimxan Yaqub, “Təbliğ” İslam Xeyriyyə Vəqfinin rəhbəri Seyid Camal Əzimbəyli, Milli Məclisin üzvü Ziyad Səmədzadə, politoloq Cümşüd Nuriyev, jurnalist Qulu Məhərrəmli və başqaları mövzu ətrafında çıxış ediblər. Çıxışçılar birmənalı olaraq toy və yas mərasimlərində israfçılığı pisləyiblər.

Tədbirdən sonra A. Paşazadə jurnalistlərə açıqlamasında QMİ tərəfindən bu tip tədbirlərin davam etdiriləcəyini bildirib: “Bu, hələ başlanğıcdır”.

allahşükür_paşazadə