Din

Din

Dövlət Komitəsinin sədr müavini: “Azərbaycan hökuməti ölkəmizdə yaşayan gürcülərlə bağlı məsələləri həmişə diqqət mərkəzində saxlayır”

30 avqust 2011 13:09 (UTC +04:00)

Onun sözlərinə görə, Gürcüstanda yaşayan soydaşlarımız, eləcə də Azərbaycanda yaşayan gürcülər ölkələrimiz arasında mənəvi körpü yaradırlar: “Bu baxımdan istər Gürcüstanda yaşayan azərbaycanlılarla, istərsə də Azərbaycanda yaşayan gürcülərlə bağlı məsələlərə, eləcə də onların milli-mənəvi dəyərlərinə və tarixi-dini abidələrinin qorunub saxlanılmasına xüsusi həssaslıq göstərilməsi təbii haldır”.

G. İsmayılov Azərbaycanda fəaliyyət göstərən gürcü-pravoslav kilsələrindən ikisində yaradılan dini icmaların Azərbaycanın Dini Qurumlarla iş üzrə Dövlət Komitəsində dövlət qeydiyyatına alındığını bildirib: “Qax rayonunun Əlibəyli kəndindəki “Müqəddəs Nino” kilsəsi təmir edilərək dindarların istifadəsinə verilib”.

O, Qax rayonunda Gürcüstan Katolikos-Patriarxı II İlyanın sərəncamı ilə “Müqəddəs Georgi” kilsəsinə yeni təyin edilən keşişin bu günlərdə fəaliyyətə başladığını deyib.

G. İsmayılov Azərbaycan hökumətinin ölkəmizdə yaşayan gürcülərlə bağlı məsələləri həmişə diqqət mərkəzində saxladığını qeyd edib: “Bunun nəticəsidir ki, gürcü mənşəli Azərbaycan vətəndaşlarının dini məsələlər də daxil olmaqla, heç bir sahədə həll olunmamış ciddi problemləri yoxdur”.

Dövlət Komitəsinin sədr müavini müxtəlif vaxtlarda Gürcüstanda yaşayan soydaşlarımızla, müsəlman icması ilə bağlı bəzi məsələlərin meydana çıxdığını və bir sıra narahatedici məqamların yarandığını da söyləyib: “Lakin həmin məsələlərlə bağlı ölkələrimizin müvafiq qurumları arasında lazımi qaydada fikir mübadiləsi aparılıb, mövcud vəziyyət müzakirə olunub və proseslərin zərərli məcraya yönəlməsinin qarşısı alınıb”.

G. İsmayılov Gürcüstanda yeni yaranan Gürcüstan Müsəlmanları İdarəsinin cəmiyyətdə və KİV-də daha çox müzakirə olunan və diqqəti çəkən məsələ olduğunu bildirib: “Azərbaycanın müvafiq qurumları, o cümlədən Dini Qurumlarla İş üzrə Dövlət Komitəsi bu məsələ ilə bağlı Qafqaz Müsəlmanları İdarəsinin mövqeyini və narahatlığını Gürcüstan tərəfinə çatdırıb. Eyni zamanda bildirilib ki, Azərbaycan tərəfi ilə əməkdaşlıq edilmədən bu istiqamətdə atılan addımlar mənfi nəticələrə gətirib çıxara bilər. Bu baxımdan qeyd edilən məsələyə xüsusi həssaslıqla yanaşılacağına və bir daha müzakirə ediləcəyinə ümidvarıq”.