Din

Din

Allahşükür Paşazadə Rusiya baş nazirinin müavinini, İnquşetiya, Kabardin-Balkar və Dağıstan rəhbərlərini qəbul edib

05 oktyabr 2011 13:47 (UTC +04:00)

Bakı. Pərvin Abbasov – APA. Qafqaz Müsəlmanları İdarəsinin (QMİ) sədri, şeyxülislam Allahşükür Paşazadə Rusiya Federasiyası baş nazirinin müavini, Rusiya prezidentinin Şimali Qafqaz Federal Dairəsi üzrə səlahiyyətli nümayəndəsi Aleksandr Xloponini qəbul edib. Bu barədə APA-ya QMİ-nin mətbuat xidmətindən məlumat verilib.

Görüşdə Qafqazda dini-mənəvi sahədə görülən işlər barədə fikir mübadiləsi aparılıb. Qonaq Rusiya dövlətinin müsəlman icmalarının fəaliyyətinə yaxından yardım göstərdiyini, bununla belə, qarşıda görüləsi işlərin çox olduğunu diqqətə çatdırıb. O, Qafqazda mövcud problemlərin həllində QMİ sədrinin dini lider və nüfuzlu şəxsiyyət olaraq müdrik mövqe, mühüm fikir və məsləhətlərinə böyük ehtiyac duyulduğunu xüsusi vurğulayıb, belə görüşlərin mütəmadi keçirilməsinin əhəmiyyətli olacağını bildirib.

A. Paşazadə öz növbəsində qonağa Azərbaycanda dini dəyərlərin qorunub saxlanılması istiqamətində dövlət rəhbərinin birbaşa diqqət və qayğısı sayəsində görülən işlər barədə məlumat verib, tolerantlığın Azərbaycan cəmiyyətinin və dövlətinin inkişafında oynadığı roldan bəhs edib. Rusiya və Azərbaycan dövlətləri arasında mənəvi əlaqələrin hər zaman inkişaf etdirilməsi zərurətindən söhbət açan QMİ sədri bu yaxınlarda Azərbaycan və Rusiya din xadimləri və ilahiyyatçılarının “Qafqazda ekstremizm ideologiyasının qarşısının alınması” mövzusunda Bakıda keçirilmiş konfransı barədə A. Xloponini məlumatlandırıb.

Görüşdə Azərbaycanın Rusiyadakı səfiri Polad Bülbüloğlu və Rusiya Federasiyasının Azərbaycandakı səfiri Aleksandr Doroxin iştirak ediblər.

QMİ sədri həmçinin Rusiya Federasiyası subyektlərinin rəhbərləri – İnquşetiya Respublikasının başçısı Yunusbek Yevkurov, Kabardin-Balkar Respublikasının prezidenti Arsen Kanokov və Dağıstan Respublikasının prezidenti Maqomedsalam Maqomedovu da qəbul edib.

allahşükür_paşazadə