Din

Din

Hidayət Orucov: “Ermənilər işğal etdikləri Azərbaycan torpaqlarında təkcə azərbaycanlılara qarşı deyil, dini-tarixi abidələrə qarşı da soyqırımı aktı törədiblər”

12 oktyabr 2011 12:46 (UTC +04:00)

Bakı. Pərvin Abbasov-APA. Azərbaycanın Dini Qurumlarla İş üzrə Dövlət Komitəsinin (DQİDK) sədri Hidayət Orucov Bakıda keçirilən “XXI əsr: ümidlər və çağırışlar” devizi ilə Beynəlxalq Humanitar Foruma dəvət olunmuş Argentina İslam Mərkəzinin prezidenti Samir Salehi və müavini Julio Madeni qəbul edib. DQİDK-nin mətbuat xidmətindən APA-ya verilən məlumata görə, görüşdə Azərbaycanda fəaliyyət göstərən dini konfessiyaların nümayəndələri – Rus Pravoslav Kilsəsinin Bakı-Azərbaycan Yeparxiyasının katibi Mefodi, Bakı şəhəri Dağ yəhudiləri dini icmasının sədri Semyon İxiilov, Avropa yəhudilərinin Bakı dini icmasının ravvini Şneor Seqal və Roma Katolik Kilsəsinin ordinarisi Vladimir Fekete iştirak ediblər.

H. Orucov Azərbaycanın dini durumu haqqında məlumat verərək deyib ki, Azərbaycan tarixən tolerant ölkə olub: “Buradan heç bir dinin, yaxud xalqın nümayəndəsi başqa yerə zorla köçürülməyib. Təsadüfi deyil ki, yəhudilər 2600, xristianlar isə 2000 ilə yaxındır ölkəmizdə mehriban şəraitdə yaşayırlar”.

Ölkəmizin müharibə şəraitində yaşadığını xatırladan Komitə sədri qeyd edib ki, ermənilər işğal etdikləri Azərbaycan torpaqlarında nəinki mülki vətəndaşlara, hətta dini-tarixi abidələrə qarşı da soyqırımı aktı törədiblər: “Onlar işğal etdikləri ərazilərdəki İslam dininə məxsus abidələri dağıdıb, qədim Alban kilsələrini isə qriqoryanlaşdırıblar. Ancaq yüksək mədəniyyət sahibi olan Azərbaycan xalqı Bakının mərkəzindəki erməni kilsəsinə toxunmayıb”.

Hidayət Orucov Argentinanın qondarma “erməni soyqırımı”nı tanıyan ölkələrdən olduğunu təəssüflə xatırladıb: “Təəssüf ki, qondarma erməni “soyqırımı”nı tanıyan azsaylı ölkələrdən biri də Argentinadır. Bunda ölkənizdə fəaliyyət göstərən erməni lobbisinin rolu böyükdür. Onlar Argentina cəmiyyətində təbliğatlarını saxtalaşdırılmış tarixi faktlar üzərində qurublar. Real tarixi faktlar isə göstərir ki, əslində, keçən əsrin əvvəllərində soyqırımı ermənilər tərəfindən türklərə, azərbaycanlılara qarşı törədilib və bu vandallıq sivilizasiyalararası dialoqdan danışan dövlətlərin gözü qarşısında bu gün də davam etdirilməkdədir. Biz istəyirik ki, burada olduğunuz müddətdə Azərbaycan gerçəkliklərini yaxından öyrənərək Argentina cəmiyyətinə ölkəmiz və onun məruz qaldığı işğal haqqında obyektiv məlumat verəsiniz”.

Qonaq Samir Saleh Argentinada katolik xristianların çoxluq təşkil etdiyini diqqətə çatdırıb. O qeyd edib ki, ölkədəki müsəlmanların əksəriyyəti XIX əsin sonlarında və II Dünya müharibəsindən sonra Suriya və Liviyadan gələn mühacirlərdir. Argentinada bütün dini qurumlara ehtiramla yanaşıldığını söyləyən qonaq Qarabağ probleminə də toxunaraq deyib ki, həm bu məsələ, həm də bütövlükdə Azərbaycan gerçəklikləri ilə yaxından tanış olmaq və bu həqiqətləri ölkəsində yaymaq istəyir. O, münaqişənin tezliklə həll olunacağına ümid etdiyini də bildirib. Görüşdə tərəfləri maraqlandıran digər məsələlər də müzakirə olunub.