Din

Ana səhifə

Din

Dini təyinatlı ədəbiyyatın satışının həyata keçirilməsinə razılıq verilməsi barədə sərəncamlar mağaza sahiblərinə təqdim olunub - FOTO

Dini təyinatlı ədəbiyyatın satışının həyata keçirilməsinə razılıq verilməsi barədə sərəncamlar mağaza sahiblərinə təqdim olunub - <font color=red>FOTO</font>

30 noyabr 2011 13:14 (UTC +04:00)

Bakı. Pərvin Abbasov – APA. Azərbaycanda dini təyinatlı ədəbiyyatın, əşyaların və dini məzmunlu başqa məlumat materiallarının ixtisaslaşdırılmış satış məntəqələri vasitəsilə satışının həyata keçirilməsinə razılıq verilməsi barədə sərəncamlar mağaza sahiblərinə təqdim olunub. APA-nın məlumatına görə, Dini Qurumlarla İş üzrə Dövlət Komitəsinin (DQİDK) sədri Hidayət Orucov bildirib ki, qanunvericiliyin tələbinə uyğun olaraq “Dini təyinatlı ədəbiyyatın, əşyaların və dini məzmunlu başqa məlumat materiallarının satışı ilə bağlı ixtisaslaşdırılmış satış məntəqələrinin yaradılması ilə əlaqədar razılığın verilməsi qaydaları haqqında” Təlimat hazırlanıb və Ədliyyə Nazirliyində təsdiqlənib.

H. Orucov deyib ki, qanuna və müvafiq təlimata uyğun olaraq dini təyinatlı ədəbiyyatın, əşyaların və dini məzmunlu başqa məlumat materiallarının satışı ilə məşğul olacaq 15 ixtisaslaşdırılmış satış məntəqəsinə razılıq verilməsi ilə bağlı xüsusi sənəd təqdim edilir: “Bu, dini durumun daha da sabitləşməsi, bu sahədə qanunvericiliyin tələblərinin yerinə yetirilməsi və dini ədəbiyyatın satışı ilə bağlı məsələlərdə yeni mərhələnin başlaması baxımından əlamətdar hadisədir”.

H. Orucov qeyd edib ki, dini ədəbiyyatın ölkəyə gətirilməsi və yayılması sahəsində kifayət qədər ciddi problemlər var idi: “Lakin son beş ildə müvafiq dövlət qurumları ilə birgə həyata keçirilmiş kompleks tədbirlər sayəsində bu sahədə əsaslı dönüş yaranıb. Dini ədəbiyyatın idxalı və yayılması istiqamətində həyata keçirilmiş tədbirlərin tərkib hissəsi kimi ilk növbədə real vəziyyət öyrənilib və daxil olmuş məlumatlar təhlil edilib. Nəticədə ölkəyə qanunsuz idxal olunan dini təyinatlı zərərli ədəbiyyatın və əşyaların sayı xeyli azalıb və bu sahə nəzarətə götürülüb. Ötən illərin statistikasının təhlili təsdiqləyir ki, bu sahədəki vəziyyət ildən-ilə yaxşılaşır”.

Komitə sədrinin sözlərinə görə, bu sahədə əsas narahatlıq doğuran məqam ondan ibarət idi ki, qanunsuz yolla ölkəyə gətirilmiş bəzi dini kitablarda zərərli dini cərəyanların ideyaları təbliğ olunur və mağazalarda belə nümunələrə tez-tez rast gəlinirdi: “Dini ədəbiyyatın digər təyinatlı mallarla birgə satışı isə bu sahəyə effektli nəzarət edilməsinə mane olur, radikal dini ədəbiyyatı yaymaqda maraqlı olan dairələrin məsuliyyətdən yayınmasına şərait yaradırdı. Lakin qanunvericiliyə edilmiş dəyişikliklərdən sonra bu sahənin tənzimlənməsi üçün unikal şərait yaranıb”.

H. Orucov bəyan edib ki, dövlət komitəsi vətəndaşların müraciəti əsasında dini təyinatlı ədəbiyyatın, əşyaların və dini məzmunlu başqa məlumat materiallarının satışı ilə məşğul olacaq ixtisaslaşdırılmış satış məntəqələrinin yaradılmasına razılıq verilməsi prosesinə başlayır və bu iş gələcəkdə də davam edəcək: “Əvvəllər hətta spirtli içkilər satılan yerlərdə də dini kitablar satılırdı. Bundan sonra yalnız rəsmi icazəsi olanlar dini təyinatlı ədəbiyyatı, əşyaları və dini məzmunlu başqa materialları sata biləcək”.