Din

Ana səhifə

Din

İran ayətullahlarının Azərbaycanla bağlı bəyanatlarına kim cavab verməlidir? - SORĞU

İran ayətullahlarının Azərbaycanla bağlı bəyanatlarına kim cavab verməlidir? - <font color=red>SORĞU</font>

02 dekabr 2011 16:02 (UTC +04:00)

Bunu Dini Qurumlarla İş üzrə Dövlət Komitəsinin sabiq sədri Rafiq Əliyev İran din xadimlərinin son bəyanatlarına Azərbaycan din xadimlərinin, habelə Qafqaz Müsəlmanları İdarəsinin (QMİ) reaksiya verməməsinə münasibət bildirərkən deyib. Bununla belə, sabiq komitə sədri hesab edir ki, bu məsələlərə münasibət bildirib-bildirməmək onların öz işdir.

İlahiyyatçı alim Elşad Miri isə APA-ya deyib ki, QMİ-nin İran ayətullahlarının bəyanatlarına münasibət bildirəcəyinə inanmır: “Çox təəssüflər olsun ki, Azərbaycanda özlərini dindar adlandıran insanların bir çoxunun məzhəb baxımından təqlid etdikləri şəxslər ya İranda oturan ayətullahlar, ya da İraqda olan insanlardır. Ona görə də bu məsələlərlə bağlı sırf bu sahənin adamlarından ayətullahların fikirlərinə mənfi münasibət açıqlanacağını gözləmirəm. Ümumiyyətlə isə demək istəyirəm ki, İslamda ayətullah deyilən bir institut yoxdur. Çünki peyğəmbər (ə.s.) özü belə, özünü tanıdarkən Allahın ayəsi yox, Allahın qulu, elçisi olaraq tanıdıb. Elə haqqında danışdığımız məsələdə də heç bir məhkəmə qərarı olmadan, zaman və məkan nəzərə alınmadan, sözü nəyə görə işlətdiyi bilinmədən hər hansı adam haqqında ölüm hökmü vermək, sonra bunun icrası ilə bağlı şadyanalıq etmək İslamın mahiyyətinə, İslamın prinsiplərinə uyğun olmayan məsələdir və ziddir.”

Müsavat Partiyası Məclisinin sədri Arzu Səmədbəyli APA-ya deyib ki, ayətullah Məhəmməd Cavad Lənkəraninin R. Tağının ölümündən sonrakı açıqlaması nə dinə, nə də insanlığa sığır: “İranın təkcə həmin ayətullahı yox, başqa ayətullahları, bir çox din xadimləri, hətta dövlət rəsmilərinin Azərbaycanın ərazi bütövlüyünü, dövlətçiliyini təhdid edən, hakimiyyətini aşağılayan çox açıqlamalarına rast gəlmişik. Eyni zamanda, İran telekanallarının da Azərbaycan dövləti əleyhinə təbliğatları olub”.

A. Səmədbəyli bildirib ki, İran dini xadimlərinin açıqlamalarına QMİ münasibət açıqlamalıdır: “Qafqaz Müsəlmanları İdarəsi mütləq bu məsələlərə münasibət bildirməlidir. Özü də bu münasibət çox sərt olmalıdır. Qafqaz Müsəlmanları İdarəsinin münasibətinin gecikməsi düzgün deyil. Münasibət bildirmək onların borcudur”.

Deputat Rasim Musabəyov APA-ya deyib ki, bir çox ölkələrdən fərqli olaraq, İranda din xadimlərinin bəyanatları onların öz mövqeyi kimi başa düşülmür: “Nəzərə alsaq ki, İranda ayətullah sıradan fərdlər deyil, bütün ölkənin dövlət və ictimai sistemi onların ətrafında qurulub, təbii ki, bu bəyanatlar qəbulolunmazdır. Düşünürəm ki, Qafqaz Müsəlmanları İdarəsinin din xadimləri bu məsələyə münasibət bildirməlidirlər. Vacib deyil ki, Şeyx özü danışsın, amma digər din xadimlərinin mövqe sərgiləməsi düzgün olardı”.

Demokratik İslahatlar Partiyasının sədri Asim Mollazadə bildirib ki, İran tərəfdən Azərbaycanla bağlı bəyanatlar düşmənçilik mövqeyini göstərir: “Bu, beynəlxalq hüquq normalarına ziddir və qonşuluq siyasətinə xələl gətirir. Azərbaycanda bu məsələlərlə bağlı birmənalı mövqe var”.

DQİDK Rafiq Tağının qarşı edilən sui-qəsdə bağlı ayətullah Cavad Lənkəraninin verdiyi bəyanata münasibət açıqlayıb. DQİDK-nin mətbuat xidmətindən APA-nın sorğusuna cavab olaraq bildirilib ki, yazıçı-jurnalist Rafiq Tağıya qarşı edilən sui-qəsd kriminal xarakterli hadisədir.

“Hadisənin hansı səbəbdən törədildiyini istintaq müəyyənləşdirəcək. Lakin bütün hallarda, insanın, xüsusilə də söz adamının qətlə yetirilməsi, yaxud ona qarşı sui-qəsd qəbuledilməzdir. Rafiq Tağının ölümündən sonra ayətullah Cavad Lənkəraninin verdiyi bəyanatda səsləndirilən fikirlər isə nəinki din xadiminə, hətta sadə müsəlmana da yaraşmır. Dini etiqadından asılı olmayaraq, insan həyatı dəyərlidir və başqasının ölümünə sevinməyə nə insani, nə də dini baxımdan haqq qazandırmaq olar”, - deyə Dövlət Komitəsindən bildirilib.

Qafqaz Müsəlmanları İdarəsindən (QMİ) məsələyə münasibət bildirilməyib.