Din

Ana səhifə

Din

“Azərbaycan Bəhailəri dini mərkəzi” dövlət tərəfindən ayrılmış vəsaitdən imtina etmələri ilə bağlı açıqlama yayıb

03 yanvar 2012 08:00 (UTC +04:00)

Dini mərkəzdən APA-ya daxil olan açıqlamada qeyd olunur ki, Azərbaycan prezidentinin göstərişi əsasında Nazirlər Kabinetinin qərarı ilə Dini Qurumlarla İş üzrə Dövlət Komitəsi Azərbaycanda fəaliyyət göstərən və qeydiyyatdan keçmiş digər dini icmalarla yanaşı, Bakı və Sumqayıt bəhai dini icmalarına da birdəfəlik maddi vəsait ayırıb: “Fürsətdən istifadə edərək bu qayğı və diqqətə görə Azərbaycan Bəhailəri Dini Mərkəzi Azərbaycan prezidentinə və Dini Qurumlarla İş üzrə Dövlət Komitəsinə dərin ehtiramını və təşəkkürünü bildirir. Bəhai dini mərkəzi, həmçinin, bunu açıqlamağı zəruri hesab edir ki, Bəhai dininin mövcud ruhani prinsiplərinə və inzibati qanunlarına istinadən, adı çəkilən Bakı və Sumqayıt bəhai dini icmaları öz daxili ehtiyaclarını ödəmək məqsədilə, bu yardımı qəbul edə bilməz və qəbul etsə belə, yalnız xeyriyyəçilik məqsədilə xərcləyə bilərdi. Ona görə də bu icmalar onlara ayrılmış maddi vəsaiti qəbul etməyib və Dini Qurumlarla İş üzrə Dövlət Komitəsinə yazaraq bildirilib ki, biz bu yardımı heç bir səbəbdən deyil, məhz dini prinsiplərimiz nöqteyi-nəzərindən çıxış edərək qəbul edə bilmirik.
Bizim bu qərarımız hökumət və dövlətimizlə, konkret olaraq, Dini Qurumlarla İş üzrə Dövlət Komitəsi ilə heç bir anlaşılmazlıq yaratmayıb, tam normal qəbul edilib və heç bir təəccüb doğurmayıb. Bu açıqlamanın yayılması bir çox informasiya agentliklərinin və qəzetlərin bu məsələyə xüsusi diqqət ayırmaları və bu məsələni araşdırmaq cəhdləri, bəzən də yardımın qəbul edilməməsinə müxtəlif forma verilməsi cəhdləri ilə əlaqədardır. Bunu bir daha vurğulamağı zəruri hesab edirik ki, ayrılan vəsaitin məbləğindən və kimlər tərəfindən ayrılmasından asılı olmayaraq, biz Bəhai Dininin işləri üçün ancaq Bəhailərin ianə vermək imtiyazları olması barədə Bəhai prinsipinə əməl edir və icmadan xaric mənbələrdən vəsaitləri qəbul etmirik”.

Qeyd edək ki, Azərbaycan prezidenti İlham Əliyevin təşəbbüsü ilə Nazirlər Kabineti Qafqaz Müsəlmanları İdarəsinə (QMİ) və qeyri-islam təmayüllü 20 dini icmaya dövlət büdcəsindən maliyyə yardımı ayrılması barədə qərar verib. Qərarla QMİ-yə 2 milyon manat, 20 qeyri-islam təmayüllü icmanın hamısına isə ümumilikdə 400 min manat vəsait ayrılıb. İki bəhai icması vəsaitdən imtina etdiyindən, 400 min manat 18 qeyri-islam təmayüllü icma arasında bölüşdürülüb.

icma