Din

Ana səhifə

Din

Hidayət Orucov: “Dinin siyasiləşdirilməsi bəzi ölkələrdə acı tendensiya xarakteri alıb” - FOTO

Hidayət Orucov: “Dinin siyasiləşdirilməsi bəzi ölkələrdə acı tendensiya xarakteri alıb” - <font color=red>FOTO</font>

31 yanvar 2012 14:47 (UTC +04:00)

Bakı. Pərvin Abbasov – APA. Azərbaycanın Dini Qurumlarla İş üzrə Dövlət Komitəsinin sədri Hidayət Orucov ATƏT-in Bakı ofisinin rəhbəri Koray Tarqayı qəbul edib. Komitənin mətbuat xidmətindən APA-ya verilən məlumata görə, H. Orucov təəssüflə bildirib ki, bəzi beynəlxalq hüquq təşkilatlarının və dövlətlərin hesabatlarında Azərbaycan haqqında obyektivliyə söykənməyən qeydlərə rast gəlinir. Bunun səbəbini məlumatların dəqiqləşdirilmədən, ətraflı öyrənilmədən sənədə daxil edilməsində görən H. Orucov vurğulayıb ki, Azərbaycan dövləti ölkə gerçəkliklərinin dünyaya olduğu kimi çatdırılmasını arzulayır: “Dinin siyasiləşdirilməsi bəzi ölkələrdə acı tendensiya xarakteri alıb. Azərbaycan dövləti isə təriqətlərüstü və humanist din siyasəti aparır”.

Koray Tarqay isə bəyan edib ki, bu vəzifədə işə başladığı gündən Azərbaycanda gördüyü milli-dini dözümlülük mühiti onu çox sevindirir: “Tolerantlığın dövlət siyasəti olduğu ölkədə işləmək çox xoşdur. ATƏT-in Bakı ofisi ölkənin din sahəsi ilə bağlı məlumatların obyektiv öyrənildikdən sonra hesabatlara daxil edilməsinin tərəfdarıdır və sizinlə şəxsən görüşməkdə məqsədimiz informasiyaları mətbuatdan və ya ayrı-ayrı şəxslərdən, qurumlardan deyil, birbaşa mənbəyindən almaqdır. Əmin ola bilərsiniz ki, fəaliyyətim dövründə bu prinsipi əsas tutacağam və ATƏT-in Bakı ofisi Azərbaycan gerçəkliyini olduğu kimi təqdim edəcək”.

ATƏT-in Bakı ofisinin rəhbəri qeyd edib ki, Azərbaycanın bütün sahələrdə durmadan inkişaf etməsi müəyyən dairələrin maraqlarına uyğun deyil və nə yolla olur-olsun ölkədə narahatlıq yaratmağa cəhd edə bilərlər: “Belə məqamlarda cəmiyyətdə vəhdətin olması vacib şərtdir və mən burada müxtəlif dinlərin, millətlərin nümayəndələrinin mehriban qonşuluq şəraitində yaşadığını müşahidə edirəm”.

Görüşdə komitə ilə ATƏT-in Bakı ofisi arasında əlaqələri genişləndirməyin yolları və digər məsələlər ətrafında da fikir mübadiləsi aparılıb.