Din

Ana səhifə

Din

Azərbaycan prezidenti Salyanda əsaslı təmir və bərpa edilmiş Cümə məscidi ilə tanış olub

14 mart 2012 10:22 (UTC +04:00)

APA-nın məlumatına görə, dövlət başçısına məscidin ərazisində aparılan abadlıq və yenidənqurma işləri barədə məlumat verilib.

Prezident məscidin əvvəlki və indiki vəziyyətini əks etdirən stendlərə baxıb.

Dövlət başçısı Babazanan dağında aparılan arxeoloji qazıntılar zamanı aşkar edilən müxtəlif dövrlərə aid əmək alətləri, bəzək əşyaları və digər tapıntılara baxıb. Sonra prezident Cümə məscidində yaradılmış şəraitlə tanış olub. Bildirilib ki, tarixi abidə olan Cümə məscidi 1865-ci ildə tikilib. Sovet hakimiyyəti illərində məscidin 21 günbəzindən 6-sı sökülüb və dini məbəddən anbar kimi istifadə olunub. Sonralar məsciddə rayon rəsm qalereyası yerləşib. 1992-ci ildən isə yenidən məscid kimi fəaliyyət göstərir.

Diqqətə çatdırılıb ki, 2003-cü ildə Kür çayının daşması ilə əlaqədar yaranan qrunt sularının təsiri nəticəsində daha 9 günbəzi uçmuş məscid yararsız vəziyyətə düşüb. 2010-cu ilin fevralından Mədəniyyət və Turizm Nazirliyi tərəfindən məsciddə təmir-bərpa işlərinə başlanılıb, ötən ilin iyununda başa çatdırılıb. Hazırda məscid 18 günbəz, 12 sütun və bir minarədən ibarətdir. Məsciddə ibadət üçün hər cür şərait yaradılıb. Yeraltı sulardan mühafizə məqsədi ilə abidənin ətrafında drenaj sistemi quraşdırılıb.

Cümə məscidi Nazirlər Kabinetinin qərarı ilə 2001-ci ildən yerli əhəmiyyətli tarixi abidə kimi dövlət tərəfindən mühafizə olunur.

Məsciddə yaradılmış şəraitlə tanış olan prezident görülmüş işlərdən razılığını bildirib.

Əliyev_cənub