Din

Ana səhifə

Din

Dini Qurumlarla İş üzrə Dövlət Komitəsi sədrinin yanında Məşvərət Şurasının növbəti iclası keçirilib - FOTO

Dini Qurumlarla İş üzrə Dövlət Komitəsi sədrinin yanında Məşvərət Şurasının növbəti iclası keçirilib - <font color=red>FOTO</font>

19 aprel 2012 14:55 (UTC +04:00)

Bakı. Pərvin Abbasov-APA. Dini Qurumlarla İş üzrə Dövlət Komitəsi (DQİDK) sədrinin yanında Məşvərət Şurasının növbəti iclası keçirilib. Bu barədə APA-ya DQİDK-nin mətbuat xidmətindən məlumat verilib.

Məşvərət Şurasının sədri Hidayət Orucov toplantını açaraq bildirib ki, qədim mədəniyyətə malik udi etnosunun respublikanın dövlət-din münasibətlərində daha geniş təmsil olunması məqsədi ilə Azərbaycan Respublikasının Alban-Udi Xristian dini icmasının sədri Robert Mobili Şuranın tərkibinə daxil edilib.

Sonra gündəlikdə duran məsələlərin müzakirəsi olub. Hidayət Orucov deyib ki, ölkədə dini durum sabitdir və bu istiqamətdə həyata keçirilən siyasət bəhrəsini verməkdədir: “Lakin mövcud sabitlikdən arxayınlaşmaq olmaz. Çünki zərərli meyllilər cəmiyyətdə çaşqınlıq yaratmaq, vətəndaşları öz məqsədlərinə çatmaqda alətə çevirmək meyllərindən rahatlıqla əl çəkmirlər. Belə meylləri dəf etməyin ən təsirli yollarından biri də dini maarifçilik işini gücləndirməkdir. Bu işdə cəmiyyətdə nüfuz sahibi olan din xadimləri daha fəal çalışmalıdırlar. Əsl dini dəyərləri təlqin etmək lazımdır ki, vətəndaşlarımız zərərli qrupların təsir dairəsinə düşməsinlər”.

Rus Pravoslav Kilsəsinin Bakı və Azərbaycan Yeparxiyasının yepiskopu Aleksandr İşein, Qafqaz Müsəlmanları İdarəsi sədrinin birinci müavini Salman Musayev, Avropa yəhudilərinin Bakı dini icmasının sədri Gennadi Zelmanoviç, Azərbaycanda Roma Katolik Kilsəsinin ordinarisi Vladimir Fekete, Azərbaycan Respublikasının Alban-Udi Xristian dini icmasının sədri Robert Mobili Azərbaycanda mövcud olan tolerantlığın, beynəlxalq aləmdə nümunəyə çevrildiyini vurğulayıblar: “Bununla belə, bəzən müəyyən radikal dairələr din adından istifadə edərək cəmiyyətdə fikir çaşqınlığı, ajiotaj yaratmaq üçün müəyyən cəhdlər göstərirlər. Doğrudur, vətəndaşların təhlükəsizliyi yüksək səviyyədə qorunur və belə kiçik qruplar dövlətimizin bütövlüyünə təhlükə yarada bilməzlər. Lakin dini maarifçilik işini elə səviyyəyə çatdırmalıyıq ki, radikal dairələrin yaydıqları ideyalar ifşa edilsin və “tor”a düşən insanlarımız din pərdəsi altında şüurlarına yeridilən fikirlərin dinlə heç bir əlaqəsinin olmadığını, əksinə, kökündə bəd niyyətlərin durduğunu anlayaraq qısa müddətdə islah olunsunlar”

Toplantıda Məşvərət Şurasının 2012-ci ilin qalan ayları üçün İş Planında dəqiqləşdirmələr edilib və bir sıra cari məsələlər ətrafında fikir mübadiləsi aparılıb.