Din

Ana səhifə

Din

Azərbaycanın tanınmış elm və din xadimlərindən ibarət nümayəndə heyəti Özbəkistana səfər edəcək

19 aprel 2012 15:17 (UTC +04:00)

Bakı. Pərvin Abbasov – APA. Qafqaz Müsəlmanları İdarəsinin (QMİ) təşkilatçılığı ilə Azərbaycanın tanınmış elm və din xadimlərindən ibarət nümayəndə heyəti aprelin 20-də Özbəkistan Respublikasına səfərə yola düşəcək. QMİ-nin mətbuat xidmətindən APA-ya verilən məlumata görə, nümayəndə heyətinin tərkibinə Milli Məclisin bir qrup deputatı da daxildir. Aprelin 23-dək davam edəcək səfər zamanı nümayəndə heyəti Buxara və Səmərqənd şəhərlərində olacaq, tarixi, elmi və dini əhəmiyyət kəsb edən məkanları ziyarət edəcək.

Buxarada Azərbaycan və Özbəkistan elmlər akademiyalarının birgə təşkilatçılığı ilə iki ölkə arasında tarixi, elmi, dini və mədəni əlaqələrə həsr olunmuş elmi-praktik konfrans keçiriləcək. Konfransda QMİ-nin sədri, tarix elmləri doktoru, professor Allahşükür Paşazadə, QMİ Elmi-Dini Şurasının sədri, akademik Vasim Məmmədəliyev, Milli Məclisin iki deputatı - fəlsəfə elmləri doktoru Rəbiyyət Aslanova, tarix elmləri doktoru Fəzail İbrahimli, həmçinin tarix elmləri doktoru Şahin Fərzəliyev, tarix elmləri doktoru Anar İsgəndərov məruzə ilə çıxış edəcəklər.

Konfrans çərçivəsində Azərbaycan və özbək alimləri, şair və mütəfəkkirlərinin Azərbaycan-Özbəkistan əlaqələrinin dərinləşdirilməsi işinə verdikləri töhfələrdən danışılacaq, əslən azərbaycanlı olan Özbəkistan vətəndaşı - alim, pedaqoq, əruz vəzninin mahir bilicisi, özbək, Azərbaycan və fars dillərində əsərlərindən ibarət 4 cildlik kitab müəllifi İbrahim Qasiminin anadan olmasının 100-cü ildönümü anılacaq.