Din

Ana səhifə

Din

Qafqaz Müsəlmanları İdarəsi İraqın Samirə şəhərində müsəlman imamlarının uyuduğu məscidin vəhşicəsinə dağıdılması ilə bağlı bəyanat yayıb

14 iyun 2007 12:20 (UTC +04:00)

Bəyanatda ABŞ hökumətinin ünvanına ciddi tənqidlər səsləndirilib. QMİ-dən APA-ya daxil olan bəyanatında bildirilir ki, bu hadisə dindarların hədsiz hiddət və qəzəbinə səbəb olub: “Bu, olduqca hiddət doğuran hadisədir. Əgər, bu müsəlmanları qəzəbləndirmək məqsədilə törədilibsə, buna nail olunub. Lakin bu qəzəbdən doğan nifrətin müsəlmanlar arasında qarşıdurma yaradılmasına yönəldilməsi məramı baş tutmamalıdır. Bu növ təxribatlar bütövlükdə İslam və onun müqəddəs dəyərlərinə qarşı yönəlib və onu törədənlər müsəlman ola bilməz. Bu, o qüvvələrin əməlidir ki, ilk növbədə, İraq xalqının və dövlətinin parçalanmasını, dərəbəylik və qarışıqlığın davam etməsini, məzhəblər arasında qarşıdurmanın qızışdırılmasını istəyir. Oxşar proseslər bir çox başqa müsəlman ölkələrində də yeridilir, hadisələrin geniş əks-səda doğurması və məzhəblərarası münasibətlərin, dini sabitliyin pozulmasına səbəb olacağına hesablanır”.
Bəyanatda QMİ dünya müsəlmanlarını diqqətli olmağa ayıq-sayıqlıq nümayiş etdirməyə, İslam düşmənlərinin dəyirmanına su tökməməyə çağırıb. Qeyd olunub ki, İraqda hiddət doğuran, minlərlə insanın həyatına son qoyan davamlı terror hadisələri, böyük tarixi və dini əhəmiyyət kəsb edən abidə və ziyarətgahların məhvi məhz ABŞ-ın bu məkana daxil olmasından sonra başlanıb. Bu baxımdan, İraqda sabitik və təhlükəsizliyin təminatçısı da təbii ki, ABŞ olmalıdır: “Biz qəti şəkildə israr edirik ki, bu və bu qəbildən olan cinayətlərin səbəbkarları cidd-cəhdlə müəyyən olunmalı və beynəlxalq məhkəmələrdə mühakimə edilməlidirlər”. Məsələ ilə bağlı QMİ sədri, Şeyxülislam Hacı Allahşükür .Paşazadə İslam Konfransı Təşkilatının baş katibi İkmələddin İhsanoğluya da müraciət edib və onunla mövcud vəziyyətdə görülməli tədbirləri müzakirə edib. Şeyx, Samirədə baş verən hadisə ilə bağlı Dünya İslam Xalq Rəhbərliyinin bu günlərdə keçiriləcək toplantısında çıxış edəcəyini bildirib. /APA/