Din

Ana səhifə

Din

Bakı kəndlərinin 40-dan artıq zəvvarı İraqın Kərbəla və Nəcəf şəhərlərinə ziyarətə yola düşüb

27 iyun 2007 11:45 (UTC +04:00)

Binəqədi kəndinin zəvvarların arasında olan sakini Ziya Aslanovun APA-ya verdiyi məlumata görə, səfəri İraqın “Əl-İraq” şirkəti təşkil edib. Qafqaz Müsəlmanları İdarəsinin (QMİ) Kərbəla ziyarətini bərpa etmədiyini bildirən Z. Aslanov sənədləşmə işlərinin “Əl-İraq” şirkəti tərəfindən hazırlandığını, İraqın Bakıdakı səfirliyindən isə viza aldıqlarını deyib. O, “Əl-İraq” şirkətinin bundan əvvəl də Kərbəla ziyarəti təşkil etdiyini bildirib. Z. Aslanov zəvvarların 9 gün İraqda qalmaq icazəsinin olduğunu söyləyib: “Amma biz ziyarəti 6 günə yekunlaşdırmaq fikrindəyik”. Avtobusla ziyarətə gedənləri İranın Mehran şəhərində “Əl-İraq” şirkətinin təmsilçiləri qarşılayacaq. Z. Aslanov ziyarətçilərin təhlükəsizliyinə təminat verildiyini, bunun şirkət tərəfindən həyata keçiriləcəyini deyib: “Biz istəyirik ki, Qafqaz Müsəlmanları İdarəsi Kərbəla xəttini yenidən bərpa etsin”.
QMİ-nin xarici əlaqələr şöbəsinin müdiri Müqəddəs Payızov isə APA-ya açıqlamasında azərbaycanlı zəvvarları Kərbəla ziyarətinə aparan şirkətin onların təhlükəsizliyinə də cavabdehlik daşımalıdır. Şöbə müdiri deyib ki, QMİ tərəfindən İraq dövlətinin ərazisindəki ziyarət yerlərinə zəvvarların səfərləri sonuncu dəfə 2002-ci ildə təşkil edilib. M. Payızov bunu İraqda sabitlik olmaması ilə izah edib və bildirib ki, idarə yalnız bu ölkədə sabitlik yarandıqdan sonra zəvvarların ziyarətlərini təşkil edəcək. /APA/