Din

Din

Xaçmaz rayonunda ziyarətgahlar təhqir olunur

19 sentyabr 2007 08:39 (UTC +04:00)

Son vaxtlar Xaçmaz rayonunda ziyarətgahlara hücumların müntəzəm xarakter alması əhalini ciddi narahat edir. Naməlum şəxslər adətən gecə saatlarında gah ziyarətgahları dağıntılara məruz qoyur, gah da buradakı müxtəlif əşyaları sındırırlar. APA-nın şimal bürosunun əldə etdiyi məlumata görə, iyun ayında Yergüc yaşayış məntəqəsinin yaxınlığında yerləşən Dədə Günəş piri dağıdılıb. Naməlum şəxslər ziyarətgahdakı nəzir qoyulan daşları çıxararaq kolluqlara atıblar. Bu günlərdə isə rayonun Köhnə Xudat kəndindəki qədim Şeyx Məhəmməd pirində xeyli qab-qacaq sındırılıb. Xaçmazın daha bir neçə yaşayış məntəqəsindən də eyni xarakterli məlumatlar daxil olub.
Əhali arasında ziyarətgahların vəhhabi kimi tanınan dindarlar tərəfindən dağıdılması barədə şayiələr dolaşır. Amma Xaçmaz rayonunun axundu Yaşar Rzayev APA-nın şimal bürosuna açıqlamasında bildirib ki, ziyarətgahların vəhhabilər tərəfindən dağıdılması barədə deyilənlər həqiqətə uyğun deyil: “Ziyarətgahlara nəzarət etmək uğrunda mübarizə gedir. Baş verənlər də bununla əlaqədardır. Münaqişə daha çox qohumlar arasında baş verir. Hər kəs pirdə dəfn edilənin özünə yaxın olduğunu iddia edir”.
Y. Rzayev ziyarətgahların təcavüzə məruz qalması barədə rayonun güc strukturlarını da məlumatlandırıb. Pirəzəmbil, Şıxlar və digər ziyarətgahlarda da qarşıdurmaların mövcud olduğunu deyən axund problemin Dini Qurumlarla İş üzrə Dövlət Komitəsi və Qafqaz Müsəlmanları İdarəsinin birgə səyi ilə yaxın vaxtlarda yoluna qoyulacağını vurğulayıb.
Xudat şəhər polis bölməsinin baş əməliyyat müvəkkili Binyaməddin Abuzərov isə müsahibəsində pirlərə hücumlardan xəbərdar olduqlarını və bu istiqamətdə araşdırmalar aparıldığını söyləyib. O, baş verənləri ziyarətgahlara yığılan nəzir və burada kəsilən qurbanlar üstündə bir-biri ilə mübarizə aparan qruplaşmaların işi kimi qiymətləndirib. B. Abuzərov polisə rəsmi müraciət olmasa da, məsələni nəzarətdə saxladıqlarını bildirib. /APA/