Din

Ana səhifə

Din

Azərbaycan Müəllimlər İnstitutunun Zaqatala filialında təhsil alan hicablı tələbələr dərsə buraxmayıblar

27 oktyabr 2007 12:11 (UTC +04:00)

Bu barədə APA-nın Şəki-Zaqatala bürosuna AMİ-nun Zaqatala filialının tələbələri məlumat verib. Tələbələrin sözlərinə görə, ötən gün institutun humanitar fənlər fakültəsinin dekanı Əminət Haxova 8 hicab geyinmiş tələbəni dərsdən çıxarıb və onların örtüklərini çıxarmayacaqları təqdirdə, dərsə buraxılmayacaqlarını deyib. Hicablı qızların dediyinə görə, yeni dərs ili başlayan gündən İnstitutda onlara baş örtüklərini açmaqla bağlı xəbərdarlıqlar edilib.
Hicablı qızlar onlara qarşı edilənlərlə bağlı şikayət edəcəklərini deyiblər.
AMİ-nun Zaqatala filialının humanitar fənlər fakültəsinin dekanı Ə. Haxova isə APA-nın bölgə bürosuna açıqlamasında hicablı qızların institutdan xaric edilmədiklərini deyib. O, ötən gün 8 nəfər hicablı qıza geyim qaydalarını pozduqları üçün irad tutulduğunu, onlara dərsə daxil olduqları vaxt baş örtüklərini soyunmaq tövsiyə edildiyini bildirib: “Lakin onlar institut rəhbərliyinin tövsiyələrini və iradını qəbul etmədiklərini deyərək, dərsdə oturmaqdan imtina etdilər. Biz onlardan tələb edirik ki, institutda təhsil alan hər bir tələbə kimi onlar da qəbul olunmuş vahid geyim qaydasına riayət edərək, dərsə qəbul olunmuş formada və başları açıq qatılsınlar”.
Azərbaycan Müəllimlər İnstitutundan APA-ya bildirilib ki, rektor tərəfindən Zaqatala filialında hicablı tələbələrin dərsə buraxılmaması ilə bağlı hər hansı tapşırıq verilməyib. Filialda baş vermiş hadisədən xəbərsiz olduqlarını bildirən tədris şöbəsinin müdiri Şamil Qasımlı məsələ ilə maraqlanacaqlarını deyib.
Dini Etiqad və Vicdan Azadlıqlarının Müdafiəsi Mərkəzinin rəhbəri Hacı İlqar İbrahimoğlu isə baş vermiş hadisə ilə bağlı onlara hər hansı müraciət daxil olmadığını deyib. O, bu barədə yalnız mətbuatdan məlumat aldıqlarını qeyd edib: “Biz indi bununla bağlı araşdırma aparırıq, nə baş verdiyini öyrənməyə çalışırıq. Həqiqətən problem yaranıbsa, onun həlli istiqamətində mümkün addımlar atılacaq”. /APA/