Din

Ana səhifə

Din

Azərbaycanın Qax rayonunun Qax-ingiloy kəndində yerləşən “Müqəddəs Georgi” kilsəsinə yeni keşiş təyin olunub

29 oktyabr 2007 12:06 (UTC +04:00)

APA-nın Şəki-Zaqatala bürosunun məlumatına görə, Gürcüstan katolikos patriarxı II İlya “Müqəddəs Georgi” məbədinin keşişi İosif Canbazaşvilini geri çağıraraq onun yerinə Georgi Abasaşvilini təyin edib. Yeni təyin olunmuş keşiş bir neçə gündən sonra rayona gələrək səlahiyyətlərinin icrasına başlayacaq. Qax-ingiloy kəndindəki mənbələrdən APA-nın yerli bürosuna daxil olan məlumata görə, G. Abasaşvili üç il bundan əvvəl də bu məbəddə keşiş vəzifəsində çalışıb. Bundan bir il əvvəl isə onu İ. Canbazaşvili əvəz edib. G. Abasaşvilinin keşiş olduğu dövrdə Qax rayonunda yaşayan gürcülərin dinlə bağlı heç bir problemi yaranmayıb.
Xatırladaq ki, bir neçə gün əvvəl APA Dini Qurumlarla İş üzrə Dövlət Komitəsi (DQİDK) tərəfindən İ. Canbazaşviliyə Azərbaycan vətəndaşlığını qəbul etmək üçün 1 ay vaxt verilməsi barədə məlumat yayılıb. Əks təqdirdə isə o, Azərbaycandan departasiya olunacaqdı.
Qax rayon İcra Hakimiyyəti başçısının elm, təhsil və mədəniyyət işləri üzrə müavini Ziyafət Xasayeva bir daha bəyan edib ki, Azərbaycan vətəndaşı olmayan şəxs ölkə ərazisində hər hansı bir dini qurumu təmsil və ya təbliğ edə bilməz: “Görünür, ölkə vətəndaşlığını qəbul etmək istəməyən İ. Canbazaşvilinin Gürcüstana geri qayıtmaqdan başqa çarəsi qalmayıb”.
Əlavə edək ki, İ. Canbazaşvili bir qədər əvvəl Gürcüstan-Azərbaycan münasibətlərinə xələl gətirmək məqsədi ilə guya Qax rayonunda fəaliyyət göstərən gürcü kilsəsinin bağlanması barədə Gürcüstan hökumətinə qeyri-obyektiv məlumat verib. Hətta həmin ərəfədə o, Qaxda tarixi abidə kimi qeydiyyata düşmüş Alban kilsəsi olan “Kürmük” məbədinin də gürcülərə məxsus olması barədə iddia irəli sürüb. Lakin hər iki ölkə rəsmilərinin apardıqları araşdırmalar nəticəsində İ. Canbazaşvilinin Gürcüstan hökumətinə qeyri-obyektiv məlumat ötürməsi faktı üzə çıxıb. /APA/