Din

Din

“Tolerantlıq örnəyi Azərbaycan” mövzusunda keçirilən konfransda Hacı Əbdüllə Hidayət Orucov arasında mübahisə yaranıb

16 noyabr 2007 12:08 (UTC +04:00)

Bu sözləri İmam Hüseyn məscidinin imamı, “Tövbə” Cəmiyyətinin rəhbəri Hacı Əbdül Beynəlxalq Tolerantlıq Günü münasibətilə “Tolerantlıq örnəyi Azərbaycan” mövzusunda keçirilən konfransda çıxış edərkən bildirib. Onun sözlərinə görə, kitabların qadağan olunmasından aidiyyəti qurumların xəbəri yoxdursa, bu araşdırılmalıdır. “Radikal cərəyanlara qarşı barışmaz olmaq lazımdır” deyən Hacı Əbdül illərdir vəhhabilərin təhlükəli olması ilə bağlı xəbərdarlıq etdiyini vurğulayıb: “Nə qədər yazmışam, çıxışlar eləmişəm, xeyri olmadı. Ola bilməz ki, Hidayət Orucovun bunlardan xəbəri yoxdur. Dini Qurumlarla iş üzrə Dövlət Komitəsinin ekspert şöbəsində Ceyhun Məmmədov adlı şəxs işləyir. O, Misirdə vəhhabilərin məktəbində oxuyub və indi gəlib dövlət qurumunda oturub şiə ilə bağlı kitablara qadağa qoyur. Araşdıran yoxdur ki, bu kimdir, nəçidir? Mən o kitabların siyahısını hazırlamışam, içərisində bircə vəhhabi kitabı yoxdur. Belə olmaz axı. Gəlin haqqımızı tələb edək”.
Hacı Əbdülün çıxışına münasibət bildirən Hidayət Orucov bildirib ki, qadağan edilən şiə kitabları adi kitablar yox, radikal fikirlər, qarşıdurma yaradan meyllərin əks olunduğu kitablardır: “Mən bu məsələ ilə məşğulam. Araşdırmışıq və məlum olub ki, qadağan olunan şiə və sünni kitablarının sayı təxminən eynidir. Özü də Hacı Əbdülün dediyi qədər 30 kitab yox, daha çox kitab qadağan edilib. Ceyhun Məmmədovla bağlı deyilənlərə gəldikdə, bəli, o, xaricdə təhsil alıb. Amma mən onun fəaliyyətində hər hansı radikal dini təriqətin təmsilçiliyini hiss etməmişəm”. H. Orucov Hacı Əbdüllə ayrıca görüşəcəyini və onun siyahısına, fikirlərinə baxacağını bildirib.
Şeyxülislam Hacı Allahşükür Paşazadə isə sözügedən siyahıya baxdığını və orada hətta Kərbala haqqında kitablar olduğunu da deyib: “Elə kitablar var ki, onları yaymaq olar. Xüsusilə şəriətlə bağlı kitabları. Amma hansı kitablar ifratçılığa, qarşıdurmaya gətirib çıxarırsa, biz buna qarşı çıxmalıyıq”.
Millət vəkili Əhəd Abıyev isə öz çıxışında Azərbaycan torpaqlarının 20 faizinin ermənilər, Bakıdakı Əbu Bəkir məscidinin isə vəhhabilər tərəfindən işğal olunduğunu deyib: “Vəhhabilərin tarixi də, bu günü də hər kəsə məlumdur. Onlar bildirirlər ki, hər bir şiəni öldürən vəhhabi cənnətə gedər. Buna görə də onların qarşısını almaq lazımdır. Bu, hər bir kəsin vəzifə borcudur”. /APA/