Din

Din

Azərbaycanlı zəvvarlar dekabrın 13-də ehram bağlayacaq

11 dekabr 2007 11:15 (UTC +04:00)

Dekabrın 12-də azərbaycanlı zəvvarları Həcc ziyarətinə aparan daha iki təyyarə reysi Bakı-Ciddə marşrutu üzrə Səudiyyə Ərəbistanı Krallığına yola salınacaq. Qafqaz Müsəlmanları İdarəsinin xarici əlaqələr şöbəsinin müdiri Müqəddəs Payızovun APA-ya verdiyi məlumata görə, zəvvarların sonuncu qrupu dekabrın 13-də həyata keçiriləcək iki təyyarə reysi ilə göndəriləcək. Azərbaycanlı zəvvarları Həcc ziyarətinə aparan birinci avtobus karvanının qrup rəhbərlərindən olan Hacı Qəni Axundov isə APA-ya açıqlamasında hazırda Mədinə şəhərində olduqlarını, dekabrın 13-də bu şəhərdən Məkkəyə yola düşəcəklərini və ehram bağlayacaqlarını bildirib. Qrup rəhbəri həmçinin zəvvarların oteldə yerləşdirilməsi sahəsində problemlər yaranması ilə bağlı yayılan məlumatların həqiqətə uyğun olmadığını söyləyib: “Bu il zəvvarlara ötən ildəkindən daha yüksək səviyyədə şərait yaradılıb” Q. Axundov ikinci avtobus karvanının da bu gün Mədinəyə yetişəcəyini deyib. Qrup rəhbəri azərbaycanlı zəvvarların səhhətinin normal olduğunu və onların ziyarət səfərinin uğurla davam etdiyini də bildirib. /APA/