Olimpiada

Ana səhifə

Olimpiada

Könül Nurullayeva: “2020-ci il Yay Olimpiya Oyunlarını keçirmək şansımız var”

13 fevral 2012 11:04 (UTC +04:00)

Amma deyə bilərəm ki, şansımız var. Mən buna inanıram”. Apasport.az saytının məlumatına görə, bunu “Bakı-2020” Təşkilat Komitəsinin icraçı-direktoru Könül Nurullayeva deyib.

Nurullayeva bu gün keçirdiyi brifinqdə bildirib ki, hələlik Bakı şəhəri 2020-ci il olimpiadası uğrunda mübarizədə iddiaçı qismində çıxış edir. Azərbaycan paytaxtının rəsmi namizəd olub-olmayacağı isə mayın 23-də Kanadanın Kvebek şəhərində keçiriləcək Beynəlxalq Olimpiya Komitəsinin (BOK) toplantısında dəqiqləşəcək.

Bütün iddiaçı şəhərlər fevralın 15-dək Sifariş Kitablarını BOK-a təqdim etməlidirlər. İndiyədək 6 iddiaçı şəhərdən yalnız Doha Sifariş Kitabını təqdim edib. “Bakı-2020”nin Sifariş Kitabı isə sabah yerli vaxtla saat 14:00-da İsveçrənin Lozanna şəhərində BOK-a təqdim olunacaq.

Nurullayeva bildirib ki, artıq Bakının Sifariş Kitabı hazırdır. Kitabı Azərbaycan nümayəndə heyəti təqdim edəcək. Heyətə gənclər və idman naziri Azad Rəhimov, Milli Olimpiya Komitəsinin vitse-prezidenti Çingiz Hüseynzadə, icraçı-direktor Könül Nurullayeva, Bakı-2020 Təşkilat Komitəsində Kommunikasiyalar üzrə rəhbəri, AFFA-nın baş katibi Elxan Məmmədov, ikiqat Paralimpiya çempionu İlham Zəkiyev, Olimpiya çempionu Zemfira Meftahətdinova və digər rəsmilər daxildir.

Bakının 2016-cı il olimpiadasına da iddia etdiyini xatırladan icraçı direktor bu dəfə Sifariş Kitabının daha mükəmməl hazırlandığını vurğulayıb: “Əvvəllər kifayət qədər təcrübəmiz yox idi. Həmin vaxt Sifariş Kitabına əsasən müsbət və mənfi tərəflərimiz BOK tərəfindən hazırlanmış Hesabat Kitabında göstərilmişdi. İndi biz müsbət tərəfləri daha da inkişaf etdirmək, mənfiləri isə aradan qaldırmağa çalışacağıq”.

BOK-a təqdim olunacaq Sifariş Kitabında isə bir sıra önəmli məsələlər yer alıb. Kitabın hazırlanmasına yerli və əcnəbi ekspertlər yardımçı olublar. Nurullayeva sənəddə yer alan məsələlər barədə kitabın təqdim olunmasından sonra məlumat veriləcəyini bildirib.

Qeyd edək ki, Bakıdan başqa, Doha (Qətər), Tokio (Yaponiya), Madrid (İspaniya), Roma (İtaliya) və İstanbul (Türkiyə) də Olimpiada-2020-yə iddiaçıdır.