Olimpiada

Ana səhifə

Olimpiada

Teo Mauxer: “Məqsədimiz Azərbaycanı velosiped xəritəsinə salmaqdır”

08 may 2012 10:18 (UTC +04:00)

Bakı – APA. Bu gün mərhum prezident Heydər Əliyevin xatirəsinə həsr edilən veloturun mətbuat ofisinin açılışı olub. Apasport.az saytının məlumatına görə, tədbirdə turnirin dünya səviyyəli olduğu və hazırlığın yaxşı keçdiyi bildirilib.

Yarışın texniki direktoru Alberxt Roeder turnirin 5 mərhələsi barəsində məlumat verib və hər mərhələnin qalibinin mükafatlandırılacağını deyib: “Turnirdə 180-ə yaxın velosipedçi mübarizə aparacaq. Hər mərhələnin sonunda isə qaliblər elan olunacaq. Turun ümumi lideri göy, xal qalibi yaşıl, dağ finişinə birinci çatan qırmızı köynək geyinəcək. Bu isə Azərbaycan bayrağını əks etdirir. Yarışda yerli idmançılar isə ağ köynəkdə çıxış edəcəklər ki, biz buna Odlar Yurdu adını vermişik”.

Daha sonra Azərbaycan Velosiped İdmanı Federasiyasının idman-direktoru Teo Mauxer turnirə qatılacaq yığmamızın üzvlərinin adını açıqlayıb: “Yerli velosipedçilərdən 4-ü bu yarışda iştirak edəcək. Onlardan Emil Rüstəmovla Qurban Tağıyev “Sumqayıt”, Akif Abdullayevlə Tural İsgəndərov “Atasport” klubların heyətində yer alacaq. İlk 3 nəfər təcrübəsiz olsa da, İsgəndərovun təcrübəsi yüksəkdir. O, Almaniyada təlim-məşq toplanışında olub və ən yaxşı nəticəni də ondan gözləyirik. Ümumilikdə isə idmançılarımız yarış öncəsi Rusiyada yarışa qatılıb. Əgər onlar Azərbaycanda 10 nəfər arasında qüvvələrini sınayırdılarsa, səfərdə 230 velosipedçi arasında mübarizə aparıblar və 3 nəfəri ilk “20-lik”də yer alıb. Əsas məqsədimiz Azərbaycanı velosiped xəritəsinə salmaqdır”.