Olimpiada

Ana səhifə

Olimpiada

Azərbaycanın akademik avarçəkənləri və kanoeçiləri olimpiadaya Polşadan yollanacaqlar

28 iyun 2012 14:08 (UTC +04:00)

Bakı-APA. 2012-ci il London Yay Olimpiya Oyunlarında çıxış edəcək akademik avarçəkənlərimiz və kanoeçilərimiz hazırlıq prosesinin son mərhələsinə qədəm qoyublar. Milli Avarçəkmə Federasiyasının mətbuat xidmətindən apasport.az saytına verilən məlumata görə, idmançılarımız mayın əvvəllərindən Polşanın Ostroda şəhərindəki “Sokol” avarçəkmə klubunda təlim-məşq toplantısındadırlar.

Hazırlıq prosesi üçün məhz belə bir məkanın seçilməsinin səbəbi bu bazada iqlim şəraitinin London olimpiadasında avarçəkmə növləri üzrə yarışların keçiriləcəyi “Eton Dorney” Mərkəzindəki ilə oxşar olmasıdır. Kurort zonasındakı toplanışa təkcə olimpiadaya lisenziya qazanmış akademik avarçəkənlərimiz Aleksandr Aleksandrov və Nataliya Mustafayeva, kanoeçilərimiz Valentin Demyanenko və Sergey Bezuqlıy – Maksim Prokopenko dueti qatılmayıb. Eyni zamanda, yeniyetmələr və 23 yaşadək kayak və kanoeçilər arasında 12 – 15 iyulda Portuqaliyanın Montemor-o-Velyo şəhərində keçiriləcək Avropa çempionatına hazırlaşan idmançılarımız da qatılıb. Onlar akademik avarçəkmə üzrə milli komandamızın baş məşqçisi Rudiger Hauffe, onun köməkçisi Yuliana Stoyeva, kayak və kanoe üzrə milli komandamızın baş məşqçisi Aleksandr Kolıbelnikov, onun köməkçisi Anatoli Dudnikin rəhbərliyi altında məşq edirlər.

Akademik avarçəkənlərimiz və kanoeçilərimiz olimpiadaya hazırlıq keçməklə bərabər Dünya Kubokunun mərhələlərində və 22-24 iyunda Xorvatiyanın paytaxtı Zaqrebdə keçirilmiş Avropa çempionatında qüvvələrini sınayıblar. Onlar Londona elə təlim-məşq məkanından yollanacaqlar. Artıq olimpiadaya getmə tarixi də məlumdur. Akademik avarçəkənlərimiz iyulun 22-də, kanoeçilərimiz isə avqustun 2-də Böyük Britaniya paytaxtında olacaqlar.

Qeyd edək ki, kişi və qadın akademik avarçəkənlərimiz 2012-ci il London Yay Olimpiya Oyunlarında 1 nəfərlik qayıqla 2000 metr məsafəyə yürüşlərə qatılacaqlar. Onlar mübarizəyə iyulun 28-də qoşulacaqlar. Kanoeçilərimizə gəldikdə, 2 nəfərlik qayıqla 1000 metr məsafəyə seçmə yürüş avqustun 7-də, 1 nəfərlik qayıqla 200 metr məsafəyə seçmə yürüş isə iyulun 10-da olacaq.