Olimpiada

Ana səhifə

Olimpiada

Prezident İlham Əliyev XXX yay Olimpiya oyunlarında iştirak edəcək Azərbaycan heyətinin yola salınması mərasimində iştirak edib - FOTOSESSİYA - YENİLƏNİB

Prezident İlham Əliyev XXX yay Olimpiya oyunlarında iştirak edəcək Azərbaycan heyətinin yola salınması mərasimində iştirak edib - <font color=red>FOTOSESSİYA - YENİLƏNİB</font>

03 iyul 2012 08:46 (UTC +04:00)

APA-nın xəbərinə görə, mərasimdə Azərbaycan prezidenti İlham Əliyev, dövlət başçısının ailə üzvləri, dövlət və hökumət rəsmiləri, millət vəkilləri, idmançılar iştirak ediblər.

Tədbirdə çıxış edən prezident İ. Əliyev Azərbaycan idmançılarının Olimpiya oyunlarında qələbə qazanacaqlarına əmin olduğunu bildirib.

Azərbaycan hökumətinin ölkədə idmanın inkişafı üçün çoxsaylı tədbirlər həyata keçirdiyini diqqətə çatdıran dövlət başçısı idmançıların məişət problemlərinin yüksək səviyyədə həll olduğunu söyləyib: “İdman bölmələrinə axın kütləvi xarakter alıb. Bizim ölkənin idman şöhrəti artıb, idmanın kütləviliyi təmin edilib. Ölkədə yeni idman infrastrukturu yaradılır. Artıq bəzi ölkələr bu sahədə Azərbaycanın təcrübəsini öyrənirlər. Hər il idmançılarımız Avropa və dünya çempionatlarında yüzlərlə medal qazanırlar”.

Prezident ölkədə Olimpiya mərkəzlərinin tikintisinin davam etdirildiyini qeyd edib. Dövlət başçısının sözlərinə görə, hazırda respublikada 34 Olimpiya mərkəzi fəaliyyət göstərir, 8 mərkəzin tikintisi isə davam etdirilir. Bununla paralel ölkədə idmanın inkişaf dinamikası da yüksəlir: “Komandamızın idmançılarının əksəriyyəti Olimpiya oyunlarında ilk dəfədir iştirak edirlər. Gənclərimizin idmana marağı yüksəkdir. Azərbaycan idmançıları bu gün dünyada çox ciddi rəqib hesab olunurlar”.

Prezident Bakı şəhərində böyük idman infrastrukturunun yaradıldığını da bildirib. Bu il Olimpiya stadionunun tikintisinə başlanacağına ümid etdiyini deyən prezident bununla yanaşı müasir üzgüçülük kompleksinin inşa ediləcəyini vurğulayıb.

Dövlət başçısı həmçinin əlavə edib ki, Azərbaycanda həm Olimpiya, həm də qeyri-olimpiya idman oyunlarının inkişafına böyük diqqət yetirilir.

Azərbaycan prezidenti London Olimpiya Oyunlarına qatılacaq idmançılardan daha çox medal və qələbə gözlədiyini də bəyan edib: “Tariximizdə ilk dəfə olaraq Azərbaycan bu yarışlarda böyük komanda – 53 nəfərlə çıxış edəcək. İdmançılarımızın böyük şansları var. Onlar üçün nəzərdə tutulan mükafat fondu artırılır, idmançıların məişət şəraiti yaxşılaşdırılır. Bilirəm ki, bununla yanaşı idmançılarımıza stimul verən başlıca amil onların vətən sevgisidir. Mən 15 ildir Milli Olimpiya Komitəsinin prezidentiyəm. Ölkə prezidenti vəzifəsinə də idman aləmindən gəlmişəm və idmançıları təmsil edirəm”.

Tədbirdə çıxış edən gənclər və idman naziri Azad Rəhimov isə qeyd edib ki, Azərbaycan müstəqillik dövründə artıq beşinci dəfədir Olimpiya Oyunlarına qatılır. A. Rəhimov həmçinin bildirib ki, milli komandanın idmançılarından 41 nəfər ilk dəfədir Olimpiya Oyunlarına qatılır. Komandanın tərkibində Azərbaycanın müstəqilliyi dövründə anadan olan idmançılar da var.

Nazir Olimpiya oyunlarına hazırlıq işlərinə dövlət büdcəsindən 14 milyon manatdan artıq vəsait ayrıldığını da əlavə edib. A. Rəhimov ilk qrupun Londona iyulun 24-də, ikinci qrupun isə avqustun 4-də yola düşəcəyini bildirib. İyulun 25-də London Olimpiya şəhərciyində Azərbaycan bayrağı qaldırılacaq, iyulun 28-də isə burada Azərbaycan Günü keçiriləcək.

Sonra sərbəst güləş üzrə Azərbaycan yığma komandasının böyük məşqçisi Firdovsi Umudov, idmanın atletika növü üzrə paralimpiya yığma komandasının üzvü, üçqat dünya çempionu Hüseyn Həsənov, boks üzrə yığma komandanın üzvü Vətən Hüseynov çıxış ediblər. Daha sonra Olimpiya andının mətnini oxunub, olimpiyaçılar Azərbaycanın Dövlət Bayrağını öpüblər.

Olimpiya _ prezident _ Əliyev