Olimpiada

Ana səhifə

Olimpiada

Cüdoçular olimpiadaya hazırlığı İsmayıllıda davam etdirirlər

17 iyul 2012 20:22 (UTC +04:00)

İsmayıllı. Elvin Yaqubov-APA. London Yay Olimpiya Oyunlarında Azərbaycanı təmsil edəcək cüdoçular İsmayıllıda təlim-məşq toplanışındadır. Yığma komandanın baş məşqçisi Ağayar Axundzadə APA-nın yerli bürosuna bildirib ki, İsmayıllı Olimpiya İdman Kompleksində keçirilən təlim-məşq toplanışına olimpiya oyunlarına lisenziya qazanan 8 idmançı-İlqar Muşkiyev, Tərlan Kərimov, Rüstəm Orucov, Elnur Məmmədli, Elxan Məmmədov, Elmar Qasımov, Kifayət Qasımova və Ramilə Yusubova, eləcə də cüdo üzrə milli yığma komandanın digər üzvləri cəlb edilib.
Ümumilikdə 30 idmançının iştirakı ilə keçirilən təlim-məşq toplanışının yüksək səviyyədə təşkil olunduğunu bildirən baş məşqçi idmançıların ümumi fiziki hazırlığına xüsusi diqqət yetirildiyini, onların yarışlarda buraxdığı səhvlərin gələcəkdə təkrarlanmaması üçün təlim keçdiklərini qeyd edib. “Olimpiyada ərəfəsində cüdoçular Rusiyanın Kislovodsk şəhərində 21 gün, İspaniyanın Barselona şəhərində 10 gün təlim-məşq keçib. İyulun 10-dan başlayaraq 19-dək İsmayıllıda məşq edən cüdoçular ayın 24-də Londona yola düşəcəklər. Elnur Məmmədli, Elxan Məmmədov və Kifayət Qasımova ikinci dəfədir ki, olimpiadada iştirak edəcək. Buna baxmayaraq 8 idmançının hamısı fiziki, taktiki və psixoloji cəhətdən olimpiya oyunlarına hazırlanıb”.