Olimpiada

Ana səhifə

Olimpiada

Ağacan Abıyev: “Sözsüz ki, boksçularımız Olimpiadada medal qazanacaqlar, medalın hansı əyarda olacağını isə Londonda görəcəyik”

24 iyul 2012 11:01 (UTC +04:00)

MOK-un baş katibi olimpiyaçılarımızın avarçəkmə, güləş və cüdo idman növlərində də uğurlu nəticə göstərəcəyini düşünür

Bakı-APA. “London Olimpiadasının Azərbaycan idmanında böyük rolu olacaq. Bu Olimpiada həm idmançıların sayına, həm də gücünə görə fərqlənəcək”. Bu açıqlamanı apasport.az saytına Milli Olimpiya Komitəsinin baş katibi, Boks Federasiyasının vitse-prezidenti Ağacan Abıyev verib.

Təcrübəli mütəxəssis London Olimpiadasına güclü heyətlə yollandığımızı xüsusi qeyd edib: “Hazırda Olimpiya yığmamızda çoxlu dünya, Avropa çempionları, mükafatçılar var. Bu o deməkdir ki, biz onlardan medal gözləyə biləcəyik. Boks idman növünə gəlincə, London Olimpiadasında 8 idmançı ilə təmsil olunmağımız federasiyamızın uğurudur. Komandamızda dünya, Avropa çempionu və mundialın 2 gümüş medalçısı var. Hesab edirəm ki, adlı-sanlı boksçularımıza Olimpiya medalı qazanmaq elə də böyük problem olmayacaq. Medalın hansı əyarda olacağını isə Londonda görəcəyik. Ancaq sözsüz ki, boksçularımız medal qazanacaqlar”.

Abıyev digər idman növlərində mümkün uğurlar barədə də danışıb: “MOK-un baş katibi kimi deyə bilərəm ki, avarçəkənlərimiz, güləşçilərimiz, cüdoçularımız dünya və Avropa çempionatlarında uğurlar qazanıblar. Onlar Olimpiya Oyunlarına necə lazımdır hazırlaşıblar. Mənə elə gəlir ki, bu idman növlərində çıxış edənlər həmin nəticəni Olimpiadada da təkrarlayacaqlar. Çox az qalıb, 2 həftədən sonra artıq nəticələr bilinəcək”.

Onun sözlərinə görə, dövlətin, prezident İlham Əliyevin idmançılarımıza göstərdiyi qayğı nəticəsiz qalmayacaq: “İdmançılar həm öz əməkləri ilə, həm də göstərdikləri nəticələrlə Azərbaycan xalqını sevindirəcəklər. Fikrimcə, burada qalıb Olimpiadanı televiziya vasitəsilə izləyənlər sevinəcəklər. Biz isə Olimpiadanın yarış meydanında olacağıq və sözsüz ki, bir az əsəb sistemimiz gərginləşəcək, yaxşılaşacaq, sevinəcəyik. Ümumiyyətlə, idmançılarımız bu Olimpiadada Azərbaycan xalqını, idman həvəskarlarını sevindirəcəklər”.

Qeyd edək ki, bu gün 53 nəfərlik Olimpiya yığmamızın 32 üzvü Londona yollanıb.