Olimpiada

Ana səhifə

Olimpiada

XXX Yay Olimpiya Oyunları başlayır

27 iyul 2012 13:00 (UTC +04:00)

Bakı. Tahir Hümmətov-APASport. İyunun 28-də Bakı vaxtı ilə 00.12-də XXX Yay Olimpiya Oyunlarının rəsmi açılış mərasimi olacaq. Apasport.az saytının məlumatına görə, artıq dünən qadın futbolçuların mübarizəyə başlaması ilə Olimpiya yarışlarına faktiki olaraq start verilib.

Böyük Britaniya paytaxtında keçiriləcək 4 illiyin ən möhtəşəm idman yarışı sayca 30-cu olsa da, 27-ci dəfə təşkil edilir. Belə ki, I və II dünya müharibələri zamanı 3 Yay Olimpiya Oyunları baş tutmayıb.

XXX Olimpiadanı qəbul edən London yarışa 3-cü dəfə ev sahibliyi edəcək. 1908 və 1948-ci illərdə buna nail olan “Dumanlı Albion”da bu dəfəki yarış əvvəlkilərdən xeyli fərqlənəcək. 64 illik fasilədən sonra adaya qayıdan Olimpiadada əvvəlki yarışlarla müqayisədə böyük dəyişikliklər nəzərə çarpır. Bu dəyişikliklər iştirakçı ölkələrin, idman növlərinin, idmançıların və medal dəstlərinin sayında aşkar hiss olunur.

Bu dəfə 204 ölkədən olan idmançılar 302 medal dəsti uğrunda mübarizə aparacaq. 17 gün ərzində təxminən 10500 idmançı 36 idman növündə gücünü sınayacaq. Olimpiadanın ilk qalibi iyulun 28-də müəyyənləşəcək. Həmin gün ilk olaraq, 10 m məsafəyə pnevmatik tüfəngdən atəş açma növündə qaliblərin adları məlum olacaq. Sonuncu medal dəsti isə qadınlar arasında müasir beşnövçülük yarışında fərqlənənlərə veriləcək.

204 iştirakçı ölkə arasında Azərbaycan da var. Ölkəmizi Londonda rekord sayda – 53 idmançı təmsil edəcək. Medal uğrunda mübarizə aparacaq idmançılarımızdan 39-u kişi, 14-ü qadındır. Ölkəmiz Yay Olimpiya Oyunlarına müstəqil ölkə kimi 5-ci dəfədir qatılır.

Təmsilçilərimiz arasında mübarizəyə qoşulacaq ilk idmançı cüdoçumuz İlqar Müşkiyevdir (60 kq). O, Azərbaycan yığmasının hesabına ilk medalı yazdıra bilər. Ümumilikdə isə Azərbaycan idmançılarının Londonda ən azı 9 medal qazanacağını proqnozlaşdırmaq mümkündür. Bu proqnozlar özünü doğrultsa, 15 idman növündə mübarizə aparan komandamız bu növlərin 60 faizində medal qazanmaqla özünəməxsus rekorda imza atmış olacaq. Xatırladaq ki, 4il əvvəl keçirilən Pekin Olimpiadasında idmançılarımız 7 medal qazanıblar.

Təmsil olunduğumuz 15 idman növü arasında əsas medal ümidlərimiz boks, güləş, cüdo, ağırlıqqaldırma, taekvondo, bədii gimnastika, kanoe və akademik avarçəkmə idman növlərinədir. İndiyədək bu 8 növdən yalnız üçü üzrə medal qazanmaq mümkün olub. Son beş idman növündə medal qazanmaqla idmançılarımız daha bir ilkə imza atmış olacaqlar.

Digər 7 idman növlərinin bəzilərində medal qazanılarsa, bu sensasiya kimi qəbul edilməyəcək. Bu, daha çox atıcılıq və atçılığa aiddir. Üzgüçülük, atletika, qılıncoynatma, velosiped idmanında (veloşosse) isə fəxri kürsüdə yer almağa ciddi ümid bəslənilmir. Əslində bu növlərdə Azərbaycanın təmsil edəcək idmançıların Olimpiadada iştirakının özü böyük uğurdur.

İdmançılarımıza uğurlar diləyirik!