Şou-biznes

Ana səhifə

Şou-biznes

Azərbaycan rəqqası “Eurovision Dance-2008” yarışmasının səhnəsində tərəf müqablinə evlənmək təklif edib

07 sentyabr 2008 17:14 (UTC +04:00)

APA-nın məlumatına görə, ölkəmizi təmsil edən rəqqaslar Eldar Cəfərov və Anna Sajina Ünryu Lloyd Uebberin əfsanəvi “Operanın kabusu” muziklinin əsasında hazırlanan və milli elementlərdən istifadə olunan rəqs nümayiş etdiriblər. Təmsilçilərimiz yarışmanın münsiflər heyəti tərəfindən 42 bal alıblar.

Xatırladaq ki, yarışmada səsin 25 faizi münsiflər heyətinin, qalan 75 faizi isə 13 ölkənin tamaşaçılarının payına düşüb. Münsiflər heyətinin ən yüksək balı isə 48 bal olub. Canlı efirdə məlum olub ki, Eldar və Anna bu yarışmadan sonra ailə qurmağı düşünürlər. Yarışmanın aparıcıs nümayişdən sonra cütlüyə ünvanladığı “siz həqiqətənmi bu yarışmadan sonra evlənəcəksiniz” sualından sonra Eldar Anna qarşısında diz çöküb və ona üzük hədiyyə edərək evlənmə təklifində bulunub.

Bu yarışmada Azərbaycanla birgə 14 ölkə - Avstriya, Danimarka, Finlandiya, Yunanıstan, İrlandiya, Litva, Niderland, Polşa, Portuqaliya, Rusiya, İsveç, Ukrayna və Birləşmiş Krallıqların rəqqasları iştirak ediblər. “Eurovision Dance-2008” yarışmasında I yerə Polşa, II Rusiya, III Ukrayna, IV Litva və V yeri Azərbaycan rəqqasları qazanıblar. Qalan yeddi yeri isə digər ölkələr paylaşıblar.

Qeyd edək ki, Azərbaycanın ilk dəfə təmsil olunduğu “Eurovision Dance” yarışması, ikinci ildir keçirilir.