Şou-biznes

Ana səhifə

Şou-biznes

Natəvan Şeyxova: “Televiziyalarda çoxsaylı müsabiqələrin keçirilməsi gələcək nəslin inkişafına mənfi təsir göstərir”

23 oktyabr 2008 09:10 (UTC +04:00)

Bakı. Ülkər Qasımova-APA. “Çoxsaylı müsabiqələrin keçirilməsinin tərəfdarı deyiləm”. Bu sözləri APA-ya açıqlamasında Azərbaycanın xalq artisti Natəvan Şeyxova deyib. Onun sözlərinə görə, belə müsabiqələr onun gənclik dövründə də keçirilib: “Düzdür, bizim gənclik dövrümüzdə bir çox müsabiqələr var idi. O müsabiqələr televiziyada yox, müxtəlif mədəniyyət saraylarında keçirilirdi. Müsabiqələrdə ən istedadlı gənclər ilk yerləri qazanırdı və yalnız qaliblərin ifası televiziyada nümayiş etdirirdilər. Həmin müsabiqələrdə iştirak edən və uğur qazanan sənətçilər bu gün ən öndə gedənlər sırasındadır. Ancaq bu gün keçirilən müsabiqələrin hamısı televiziyada göstərilir. Bu da həm televiziyaları korlayır, həm də gələcək nəslin inkişafına mənfi təsri göstərir”.

Natəvan Şeyxova belə müsabiqələrin tamaşaçıları çaşdırdığını deyib: “Tamaşaçılar kimin yaxşı, kimin pis oxuduğunu anlamırlar. Özü də bu müsabiqələrdə qalib mobil telefonla səsvermə vasitəsilə müəyyən olıunur. Tamaşaçılar da çaşıb qalırlar, nə edəcəklərini bilmirlər. Bütün bu amillər isə gələcək nəslin inkişafına mənfi təsir göstərir. Bunun üçün də televiziyalarda bu günün uşaqlarının düzgün inkişaf etməsi üçün ancaq keyfiyyətli verilişlər və müsabiqələr göstərilməlidir. Bu işlərdə professionallıq tələb olunur. Çünki televiziya cəmiyyətin inkişafına təsir göstərir. Indi isə hər kəs televiziyadan pul qazanmaq istəyir. Hər televiziya reytinqinin yüksək olmasına can atır. Ona görə də bu gün televiziyalarımızda qarışıq vəziyyət yaranıb”.

Natəvan Şeyxova televiziyalarda keçirilən estrada müsabiqələrin münsiflər heyətinə dəvət almadığını da vurğulayıb. “Bizim zamanımıza Bədii Şura var idi və hər bir mahnı həmin şuradan keçəndən sonra televiziyada ifa oluna bilərdi. Mahnı sözləri, mahnının bəstəsi və ifası mütləq professional səviyyədə olmalı idi. Ona görə də o zaman Rauf Hacıyev, Cahangir Cahangirov, Emin Sabitoğlu kimi bəstəkarlar yetişmişdi. Bu gün musiqi tədris edən təhsil ocaqlarında tələbələr köhnə mahnılara müraciət etməyi daha üstün tuturlar. Çünki həmin mahnılarda peşəkarlıq var”.

Vaxtilə digər ölkələrdə Azərbaycanın professional sənətçilərinin yüksək səviyyədə konsertlərinin təşkil olunduğunu yada salan Natəvan Şeyxova, hazırda bu konsertlərin ancaq diaspora səviyyəsində keçirilməsinə üzüldüyünü bildirib: “O zaman başqa ölkələrdə konsert təşkilində təşkilatçılıq yüksək səviyyədə olurdu. Afişalarımız hazırlanırdı, gözəl konsert salonu təşkil olunurdu, biz də gedib orada Azərbaycan mədəniyyətini yüskək səviyyədə təmsil edirdik. Ancaq bu gün belə konsertlər diaspora xətti ilə keçirilir və iştirak edən sənətçilərimiz də gəlib deyirlər ki, Moskvada, Nyu-Yorkda, Vaşinqtonda yüksək səviyyədə konsert verdik. Axı bu yalandan və özünü aldatmaq başqa bir şey deyil. Mənim Moldovada iki qız pərəsətişkarım vardı, onlar Bakıya yanıma gəlmişdilər. Yaltada konsert verəndə isə onlar yenidən tamaşaçı zalında əyləşmişdilər. Arzum odur ki, bugünkü gənc müğənnilər də bu cür tamaşaçı sevgisi dadsınlar. O zaman inkişaf da olacaq”.

Tanınmış müğənni bu gün Azərbaycanda estradanın olmadığını və bu janrın yalnız formal xarakter daşıdığını da açıqlayıb: “Bu gün professional estrada mahnıları yazılmalıdır. Baxın, bu gün bir çox dünya ölkələrində məhz keçmiş dövrlərin mahnıları ifa olunur. Çünki o mahnılar elə peşəkarcasına yazılıb ki, illər belə onları gözdən sala bilmir. Qulaq asdıqca, asmaq istəyirsən”.