Şou-biznes

Ana səhifə

Şou-biznes

“N brothers” qrupunun rəhbəri Namiq Qafarov İlhamə Quliyevanın tələbəsini istedadsız adlandırıb

04 noyabr 2008 12:13 (UTC +04:00)

Bakı. Ülkər Qasımova - APA. Bu gün Azərbaycanın xalq artisti İlhamə Quliyeva tələbəsi Zaur Əsgərovla birlikdə mətbuat konfransı keçirib. APA-nın məlumatına görə, tədbirdə çıxış edən İlhamə Quliyeva tələbəsinə daim dəstək olacağını vurğulayıb: “Zauru ilk gündən dəstəkləmişəm və hər zaman ona yardım əlimi uzatmağa hazıram. İstedadı və tərbiyəsi ilə o, çoxlarından fərqlənir”.

Konfransda çıxış edən Zaur isə mətbuat konfransı keçirməkdə əsas məqsədinin son zamanlar baş verən bəzi məqamlara aydınlıq gətirmək olduğunu deyib: “Şou-biznesdəki bəzi kəslər məni aldatmaq istəyib. “N brothers” qrupunun rəhbəri Namiq Qafarov mənimlə işləmək üçün 100 min dollar tələb etdi. Deyəndə ki, İlhamə xanımın tələbəsiyəm, bütün işlərdə ondan məsləhətlər alıram, məbləği aşağı saldı, bu işin 15-20 minə başa gələcəyini dedi. Halbuki həmin prodüser toylarda disk qoymaqdan başqa heç nə bacarmır”. Zaur bundan sonra nə prodüserə, nə də stilistə ehtiyacı olduğunu bildirib: “Hamısı artıq əsəbdir. Elə gəlirlər, ailədə olan söhbətləri gedib orda-burda danışırlar. İşçi müğənninin mətbəxinə daxil olmamalıdır”.

İlhamə Quliyeva da tələbəsi Zaurdan 100 min dollar tələb edən Namiq Qafarovun və onun rəhbərlik etdiyi qrupun ünvanına bəzi ifadələr işlədib: “Bu gün Namiq müəllimi xeyli reklam etdik. Getsin, bir müddət kef eləsin. Bundan sonra “N brothers” qrupunu daha çox toylara aparacaqlar. Antireklam özü də bir reklamdır”.

Məsələyə münasibət bildirən Namiq Qafarov isə APA-ya açıqlamasında Zaurun istedadsız və qeyri-peşəkar müğənni olduğunu deyib: “Düzdür, mən ondan müəyyən miqdarda pul istəmişəm. Çünki o, “bozbaş müğənni” olduğu üçün tanınması üçün bu pul lazımdır. Hər halda, heç bir prodüser bu işi pulsuz görməz. Sonda mən ondan 10 min manat istədim. Hər halda, bu işi pulsuz görəsi deyildim ki... İkincisi də, məsləhətim budur ki, Zaur getsin, özünə başqa iş tapsın, belə məsələlərlə özünü reklam eləməsin. Məni hamı yaxşı tanıyır. O müğənninin səsi, canlı ifadan xəbəri yoxdur. Öz işimin professionalıyam və Zaur kimilərlə işləməyə vaxt sərf etmək niyyətində deyiləm”.