Şou-biznes

Ana səhifə

Şou-biznes

Zeynəb Xanlarova: “20 il sonra konsert verəcəyim bu günü səbirsizliklə gözləyirdim” - FOTOSESSİYA

Zeynəb Xanlarova: “20 il sonra konsert verəcəyim bu günü səbirsizliklə gözləyirdim” - <font color=red>FOTOSESSİYA</font>

06 noyabr 2008 08:54 (UTC +04:00)

APA-nın məlumatına görə, Heydər Əliyev Sarayının əsaslı təmirindən sonra gerçəkləşən konserti bir çox məqamlarla digər proqramlardan fərqlənib. Dünyanın bir çox ölkələrində Azərbaycanı layiqincə təmsil edən və artıq 72 yaşını tamamlayan Zeynəb Xanlarovanın 20 ildən sonra çıxış etdiyi səhnə sadəliyi ilə tamaşaçıları heyran edib. Səhnədə “Dünyanın Zeynəbi” yazısından başqa heç bir fotoşəkildən, əlavə dekorasiyadan istifadə edilməyib.

Saat 19:15-də başlanan konsertdə ilk əvvəl Zeynəb Xanlarovanın uşaqlıq, gənclik illərindən ibarət fotolar, müxtəlif illərdə verdiyi konsertlərdən video görüntülər nümayiş etdirilib. Daha sonra Zeynəb Xanlarova qara parıltılı geyimdə səhnəyə çıxıb və “Dünyanın xoşbəxti mənəm dünyada” mahnısını ifa edib. Sənətkarın bu ifası tamaşaçıların ayaqüstü alqışları ilə müşayiət olunub. Birinci mahnıdan sonra tamaşaçılarla salamlaşan Zeynəb Xanlarova çıxışına “sizin üçün o qədər darıxmışam ki...” cümləsi ilə başlayıb: “İnanın ki, bu günü səbirsizliklə gözləyirdim. Bu gün mənim həyatımda xüsusi yer tutur. Dövlət başçısı İlham Əliyev bu möhtəşəm saray təmirə bağlananda məndən soruşdu ki, “Saray açılandan sonra orada konsert verəcəksən?” Mən də dedim, əlbəttə yenə də konsert verəcəyəm. Bu yaxınlarda isə mənə dedi ki, “konsertə dəvət etsən, gələrəm”. Düzdür, mən dəvət etmişdim, ancaq dövlət başçımız Türkiyədə səfərdə olduğu üçün bu gün burada iştirak edə bilmədi. Ancaq mən yenə də sizin qarşınızdayam”.

Daha sonra isə Zeynəb Xanlarova repertuarında yer alan “Şikayətim var”, “Canı yanan ya bir olar, ya iki”, “Nədən oldu”, “Ürəyimlə bacarmıram, neyləyim”, “Züleyxa” kimi məşhur mahnıları ifa edib. Konsertdə Zeynəb Xanlarovanın özünün bəstələdiyi “Füzuli dünyası” mahnısı ilk dəfə səslənib. Konsertdə bir neçə dəfə tamaşaçılarla söhbət edən Zeynəb Xanlarova ”millət məni Zeynəb edib, mən də xalqım qarşısında baş əyirəm” deyərək, canlı ifasında qüsurlarını bağışlanmasını istəyib: “Bu gün bütün ifam canlıdır, fonoqram oxumuram. Ona görə də əgər hər hansısa bir qüsura yol versək, bizi bağışlamağınızı rica edirəm. Nə qədər ki, bu səs məndə var, oxuyacağam, sizdən heç zaman ayrılmayacağam”. Konsertin ikinci hissəsində isə ağ rəngli geyimlə səhnəyə çıxan müğənni daha çox xarici mahnıları ifa edib. Konsertin ikinci hissəsində bəstəkar Rauf Məmmədov Zeynəb Xanlarovaya xalça hədiyyə edib və onun üçün “Yalvarırıq oxu, Zeynəb” mahnısını oxuyub. Saat 24:10-na kimi davam edən konsertə Zeynəb Xanlarova “Yaşa, yaşa, yaşa Azərbaycan” mahnısı ilə yekun vurub.

Konsertdəki tamaşaçılara üzərində Zeynəb Xanlarovanın şəkli olan və “Dünyada bir Zeynəb var...” yazısı yer alan döş nişanı hədiyyə edilib. Konserti izləməyə gələnlər arasında mədəniyyət və turizm nazirinin müavini Ədalət Vəliyev, Azərbaycan Dövlət Filarmoniyasının direktoru Murad Adıgözəlzadə, əməkdar artist Azərin, sənətçilər Ruhi və İradə İbrahimova da olub.

Qeyd edək ki, Zeynəb Xanlarova bu gün də Heydər Əliyev Sarayında konsert verəcək.