Şou-biznes

Ana səhifə

Şou-biznes

Sərxan Kərəmoğlu: “Mən İlhamə Quliyeva üçün nə Aygün Kazımovayam, nə Faiq Ağayev, nə də Röya”

24 noyabr 2008 14:33 (UTC +04:00)

Bakı. Ülkər Qasımova-APA. “Sonuncu məhkəmə prosesində İlhamə Quliyevanın qohumları artıq məğlub olacaqlarını bilib, məndən bu işdən əl çəkməyi xahiş ediblər. Ancaq mən nə Aygün Kazımova, nə Faiq Ağayev, nə də ki, Röyayam ki, dediyimdən dönüm. Mənim bir üzüm var. O elə bildi ki, qohumlarının bu hərəkətindən sonra mən bu işdən vaz keçəcəyəm. O da çıxıb deyəcək ki, Sərxan məndən üzr istədi, ayaqlarıma qapandı. Mən sizin vasitənizlə bəyan edirəm ki, İlhamə Quliyeva hamının qarşısında məndən üzr istəməsə, bu işdən vaz keçməcəyəm”. APA-nın məlumatına görə, bu sözləri Moskvadakı Nəsibə Zeynalova adına Teatrın direktoru Sərxan Kərəmoğlu noyabrın 21-də Yasamal Rayon Məhkəməsində hakim Abbas Rzayevin sədrliyi ilə keçirilən məhkəmə prosesinə həsr solunmuş mətbuat konfransında açıqlayıb. O bildirib ki, İlhamə Quliyevanın bu gün mətbuata qohumlarının ona zəng etməməsi ilə bağlı verdiyi açıqlama həqiqəti əks etdirmir: “Guya ki, onun qohumları mənə zəng etməyib. Bu günə kimi də onun qohumları məndən əl çəkmir. Bu zənglərdən bezib on günlük başqa yerə getməyə qərar vermişəm. Ilhamə Quliyeva deyir ki, milyonlarla tamaşaçı qarşısında ondan üzr istəsəm belə, məni bağışlamayacaq. Amma o bunu görməyəcək. Mən bu iddianı qaldırmışam və onu məhkəməyə vermişəm, bu işin də sonuna çıxacağam. İlhamə Quliyeva Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinə göndərdiyi şikayət ərizəsində mənim şərəf və ləyaqətimə toxunub, böhtan atıb. Mənim adımın qarşısında isə yazıb ki, müxalifətçi Flora Kərimova ilə əlbir olub, mənə qarşı təxribat hazırlayırlar. Məni dövlətin əleyhinə olan bir insan kimi qələmə verib. İlhamə Quliyeva bu il sentyabrın 6-da Baş Mütəşəkkil Cinayətkarlıqla Mübarizə İdarəsinə göndərdiyi şikayət ərizəsində mənim haqqımda təhqiramiz ifadələr yazıb. Onun şikayət ərizəsində Flora Kərimovanın adı dəfələrlə hallanıb, özü də müxalifətçi Flora Kərimova kimi qələmə verib. Şikayət ərizəsində onu da yazıb ki, guya mən Flora Kərimova ilə birləşərək onun prezident seçkiləri ilə bağlı keçirdiyi konsertlərə mane oluram. Məni də, Flora Kirmovanı da siyasi sobatajda günahlandırıb. Bu şikayət ərizəsini məni həmin idarəyə çağırarkən vəkilim İlhamə Həsənova oxuyub”.

S. Kərəmoğlunun hüquqlarını müdafiə edən vəkil İlhamə Həsənova isə deyib ki, dəfələrlə məsələ qaldırmalarına baxmayaraq, İ. Quliyevanın hüquqlarını müdafiə etdiyi şəxslə bağlı Baş Mütəşəkkil Cinayətkarlıqla Mübarizə İdarəsinə yazdığı şikayət ərizəsi məhkəməyə təqdim olunmayıb: “Bizi narahat edən odur ki, bu müddət ərzində ərizənin mahiyyəti dəyişdirilə bilər. Belə olan təqdirdə isə artıq gec olacaq. Biz isə bununla bağlı oktyabrın 1-də baş prokuror Zakir Qaralov, daxili işlər naziri Ramil Usubova müraciət ünvanlamaşıq. İndi bu müraciətlərimizin nəticəsini gözləyirik”. S. Kərəmoğlu isə bildirib ki, həmin idarə adının mətbuatda yayımlanmamasının tələb edir: “Mənə dəfələrlə zənglər olub və bildiriblər ki, həmin idarənin adı mətbuatda çəkilməməlidir. Ancaq dəfələrlə məhkəmədə tələb etdiyimiz həmin şikayət ərizəsi təqdim olunmayıb”.

S. Kərəmoğlu onu da deyib ki, İlhamə Quliyevadan şərəf və ləyaqətini təhqir etdiyi, ona böhtan atdığı üçün 15 min manat təzminat istəyir: “ Məhkəməni udacağıma tamamilə inanıram. Çünki mənim sübutlarım və dəlillərim var. Onları növbəti məhkəmələrdə üzə çıxaracağam”.

Mətbuat konfransında xalq artisti Flora Kərimova iştirak etməyib.

Qeyd edək ki, S. Kərəmoğlu xalq artisti İlhamə Quliyevaya qarşı Cinayət Məcəlləsinin 147 (böhtan) və 148-ci (təhqir) maddələri ilə ittiham irəli sürüb. Növbəti məhkəmə prosesi dekabrın 4-də Yasamal Rayon Məhkəməsində keçiriləcək.