Şou-biznes

Ana səhifə

Şou-biznes

İlhamə Quliyeva: “Faiq Ağayevin arxasında dağ kimi dayanmışam”

19 dekabr 2008 15:14 (UTC +04:00)

Bakı. Ülkər Qasımova-APA. Azərbaycanın və Dağıstanın xalq artisti İlhamə Quliyeva xalq artistləri Flora Kərimova ilə Faiq Ağayev arasında baş vermiş qalmaqala münasibət bildirib. İlhamə Quliyeva APA-ya açıqlamasında Faiq Ağayevin dostu olduğunu söyləyib: “Mən sona kimi onun arxasında dağ kimi dayanacağam. Bu qalmaqalda biabırçı bir vəziyyət yaranıb. Faiq Ağayev mənim dostumdur və mən Faiqi hər zaman dəstəkləmişəm və nəfəs aldığım son ana qədər də dəstəkləyəcəyəm. Hər şeyin qayda-qanunu var. İnsanın səbr kasası dolanda o tərəfmüqabili haqqında dərindən bildiklərini açıqlayırsa, bu kişilikdir. Bunu hər adam edə bilməz. Faiqin dediklərində bir kəlmə yalan olsa, o bunu heç zaman açıqlamaz. Faiq əvvəldən-sona kimi hansı fikirləri söyləyibsə, bunların hamısı doğrudur, hətta onun bilmədiyi məqamlar da var. Ona görə də mən deyirəm ki, heç kim başqasının şərəf və ləyaqətini tapdalamasın, heç kim heç kəsə şər- böhtan atmasın. Nəticədə belə olur ki, o yalanlar, böhtanlar insanın (əgər ona insan demək olarsa) özünə qayıdır. Ona görə hesab edirəm ki, o şəxs bu gün rəzil bir vəziyyətdədir. Faiq Ağayev danışığında, ifadələrində doğruları söyləyib, buna görə də onun arxasında dağ kimi varam. Faiq Ağayev xalq artistidir və heç kəsə ixtiyar verilmir ki, Faiq Ağayevə məxsus olan bir məqama burnunu soxsun. Faiq uzun müddət onun haqqında saxladığı biabırçı məqamları deməyə məcbur oldu”.

Baş verən qalmaqalda F. Ağayevdə heç bir günah görmədiyini deyən İ.Quliyeva, bu məsələdə sona kimi onun yanında olacağını da diqqətə çatdırıb: “Məhkəmə prosesində də mən və mənim komandam Faiqin yanında olacağıq. Mənim yaxınlarım bu məhkəmədə iştirak edəcəklər. Şahid qismində məhkəmədə ifadə verməyim Faiqin opponenti üçün böyük şərəf olar. Hər şey aşkardır və göz qabağındadır”.

Bu qalmaqalda onun əlinin olub-olmaması sualını da cavablandıran müğənni, Faiq Ağayevin açıqlamalarında iştirak etmədiyini deyib: “Kim bunu deyirsə, yalan deyir. Bu qətiyyən belə deyil, ola da bilməz. Faiq Ağayevin verdiyi açıqlamalarda mən iştirak etməmişəm. Hətta Faiq Ağayev elə açıqlamalar verir ki, mən heç onları bilməmişəm. Faiq Ağayev yetərincə ağıllı, savadlı və öz hüquqlarını müdafiə etməyi bacaran bir insandır. Faiq Ağayevin heç bir kəsin fitvasına ehtiyacı yoxdur. Digər bir tərəfdən isə özümə həddindən artıq böyük hörmətim var. Mən heç vaxtı, heç kimə nəyisə tövsiyə edib göstəriş vermirəm. O adam özünü yaxşı aparardı, Faiq Ağayev də onun biabırçı həyat məqamlarını üzə çıxarmazdı. Mən özüm o açıqlamanı oxuyanda inanın ki, şok vəziyyətində idim”.

İ. Quliyeva bu məsələdə Faiq Ağayevin qalib olacağını dilə gətirib.