Şou-biznes

Ana səhifə

Şou-biznes

Fəxri adlara layiq görülən bəzi sənətçilər mükafatlandırma mərasiminə nə üçün qatılmayıb? - SORĞU

Fəxri adlara layiq görülən bəzi sənətçilər mükafatlandırma mərasiminə nə üçün qatılmayıb? - <font color=red>SORĞU</font>

25 dekabr 2008 13:24 (UTC +04:00)

Bakı. Ülkər Qasımova-APA. Dövlət başçısının sərəncamı ilə müxtəlif fəxri adlara layiq görülən bəzi sənətçilərin bir neçə gün əvvəl keçirilən mükafatlandırma mərasiminə qatılmaması birmənalı qarşılanmayıb. APA-nın məlumatına görə, həmin tədbirdə iştirak etməyənlər arasında xalq artistləri Aygün Kazımova, Brilliant Dadaşova, Nisə Qasımova və əməkdar artist Aybəniz Haşımova da olub. Aygün Kazımova APA-ya açıqlamasında canlı yayımda olduğu üçün mərasimə qatıla bilmədiyini deyib: “Məlumdur ki, mən həftənin beş günü ATV televiziyasında “Xeyir ola” verilişini aparıram. Bu veriliş canlı yayımlanır və 12:00-dan 13:00-da kimi davam edir. Həmin mərasim isə mənim canlı verilişimin vaxtına təsadüf etdiyindən iştirak edə bilmədim. Ancaq mərasimə çatmaq üçün çox çalışdım. Yolda zəng vurub dedilər ki, artıq mükafatlandırma prosesi başa çatıb”.

Mərasimə qatılmayan Nisə Qasımova məsələyə özü münasibət bildirmək istəməsə də, prodüseri Hüseyn Cavadzadə bunları deyib: “Nisə xanım həmin mərasim vaxtı canlı verilişdə idi. Mərasimə qatılmamasının səbəbi də bu olub. Ancaq onun nümayəndəsi mərasimdə iştirak edib və mükafatı alaraq Nisə xanıma təqdim edib”.

Əməkdar artist Aybəniz Haşımova isə APA-ya açıqlamasında mərasimə qatılmamasını səhhətindəki problemlərlə əlaqələndirib: “Həmin tədbirdə bacım Şahnaz Haşımova iştirak edirdi və mükafatımı da o alıb. Səhhətimlə əlaqədar mən tədbirə qatıla bilmədim. Bəlkə də bu bir qismət imiş. Düşünürəm ki, sənətdə anam olan Şahnaz Haşımovanın mənim əvəzimdən bu mükafatı alması bir qismətdir. Mədəniyyət və turizm naziri Əbülfəs Qarayev mənim yaradıcılığımı uzun sürən repressiyadan qurtardı. Buna görə Əbülfəs Qarayevə təşəkkür edirəm. Uzun müddət ərzində yaddan çıxmış Aybəniz Haşımovanı o yada saldı”. Məsələ ilə bağlı Brilliant Dadaşovadan münasibət öyrənmək mümkün olmayıb.

Qeyd edək ki, mərasimdə iştirak edən xalq artisti Zülfiyyə Xanbabayeva mükafatı aldıqdan sonra dərhal mərasimi tərk edib. Sənətçi bunun səbəbini isə azyaşlı qızını evdə qoyması ilə əlaqələndirib. Ancaq Zülfiyyə Xanbabayevanın Faiq Ağayevi ön sıralarda görüb bu addımı atması diqqətlərdən qaçmayıb. Zala daxil olan kimi oturacaqlarına nəzər salan Z. Xanbabayeva Faiq Ağayevi birinci sırada görəndən sonra, küncə qoyulmuş oturacaqlardan birində əyləşib. Mükafatı ilk olaraq Faiq Ağayev alsa da, o, mərasimi sona kimi izləyib. A. Kazımova və B. Dadaşovanın mərasimə qatılmaması və Z. Xanbabayevanın mərasimi çox tez tərk etməsi xalq artisti Faiq Ağayevlə bu üçlük arasında yaşanan problemlərlə əlaqələndirilir. Faiq Ağayev isə bu məsələyə münasibət bildirmək istəməyib: “Mən ancaq özümə cavabdehəm”.