Şou-biznes

Ana səhifə

Şou-biznes

“Eurovision-2009” müsabiqəsində Azərbaycanı təmsil edəcək sənətçinin adı martın 16-na kimi məlum olacaq

05 yanvar 2009 11:25 (UTC +04:00)

Bakı. Ülkər Qasımova-APA. “Eurovision-2009” mahnı müsabiqəsində Azərbaycanı təmsil edəcək müğənninin adı və ifa edəcəyi mahnı martın 16-na kimi məlum olacaq. Bu barədə APA-ya “Eurovision” müsabiqəsi üzrə Azərbaycan nümayəndə heyətinin rəhbəri Adil Kərimli deyib. Onun sözlərinə görə, martın 16-na kimi artıq həm təmsilçinin adı, həm də ifa olunacaq mahnı Avropa Yayımları Birliyinə təqdim olunmalıdır: “Həmin tarixdə müsabiqədə iştirak edəcək ölkələrin nümayəndələrinin ilk toplantısı keçiriləcək. Elə həmin toplantıda artıq hər ölkə öz təmsilçisini təqdim edəcək. Təmsilçimizin seçilməsi ilə bağlı artıq biz ilkin olaraq sənədləri qəbul etməyə başlamışıq. Təqdim olunan sənədlər arasından 10 sənətçisinin sənədi rəsmi qeydiyyatdan keçib. Ancaq bu proses hələ də davam edir və təmsilçimiz peşəkarlardan ibarət münsiflər heyəti tərəfindən seçiləcək”.

Azərbaycan nümayəndə heyəti rəhbərinin sözlərinə görə, müsabiqədə təmsilçinin ifa etməsi üçün artıq bəstəkarlar tərəfindən mahnılar yazılmağa başlanılıb: “Bəstəkarlar tərəfindən mahnılar yazılır, eyni zamanda müəlliflər sözlər yazırlar. Ancaq hələlik bizə təqdim olunan bir mahnı yoxdur. Bəstəkarın kimliyindən və şəxsiyyətindən asılı olmayaraq hansı mahnı daha yaxşı olsa, o da seçiləcək”.

“Eurovision-2009” yarışmasının şərtlərində bir qədər dəyişiklik olduğunu da deyən A. Kərimli, Avropa Yayımları Birliyi tərəfindən builki yarışma ilə bağlı dörd məktub göndərildiyini bildirib: “Müsabiqənin Moskvada keçirilməsi ilə, üzvlük, eyni zamanda müsabiqənin səsverməsində dəyişiklik olması ilə bağlı məktub almışıq. Sözsüz ki, artıq Azərbaycan müsabiqədə iştirak etməsi ilə bağlı yazılı razılığını bildirib. Müsabiqənin final mərhələsinin keçirilmə qaydalarına dəyişiklik edilməsinə isə bəzi ölkələrin səsvermənin qeyri-obyektiv keçirilməsinə etirazı səbəb olub. Burada səsvermə iki hissədən ibarət olacaq. Bu dəfə həm telefonla sms səsverməsi, həm də münsiflər heyəti tərəfindən səsvermə həyata keçiriləcək. Artıq bu dəyişikliyə bütün iştirakçı dövlətlər imza atıb. Belə səsvermə “Eurovision”un tarixində tətbiq olunub. SMS-lə səsvermə isə 2003-cü ildən tətbiq olunmağa başladı və 2008-ci ilə qədər həyata keçirilirdi. Bu addım səsverməni təkmilləşdirmək naminə yox, obyektivlik naminə atılıb”.

A. Kərimlinin sözlərinə görə, “Eurovision -2009” müsabiqəsində iştirak edəcək ölkələrin siyahısı hələlik tam dəqiqləşməyib və tam siyahı yanvarın ortalarında məlum olacaq.