Şou-biznes

Ana səhifə

Şou-biznes

Məhkəmə İlhamə Quliyeva ilə Sərxan Kərəmoğlunun qarşılıqlı iddialarını təmin etməyib

15 yanvar 2009 10:47 (UTC +04:00)

Bakı. Ülkər Qasımova-APA. Yasamal rayon Məhkəməsində hakim Abbas Rzayevin sədrliyi ilə xalq artisti İlhamə Quliyevanın Sərxan Quliyevə (Kərəmoğlu) və Sərxan Quliyevin İlhamə Quliyevaya qarşı qaldırdığı qarşılıqlı iddia əsasında məhkəmə prosesi keçirilib.
İ. Quliyevanın mətbuat katibi Faiq Ələkbərli APA-ya bildirib ki, S. Quliyevin İ. Quliyevaya qarşı mülki qaydada şərəf və ləyaqətə, işgüzar nüfuza xələl gətirməsi ilə bağlı maddi və mənəvi ziyanın ödənilməsinə dair iddiası üzrə məhkəmə prosesi yekunlaşıb. Onun sözlərinə görə, S. Quliyevin İ. Quliyevaya qarşı iddiası təmin olunmayıb. Mətbuat katibi prosesin İ. Quliyevanın xeyrinə yekunlaşdığını deyib.
Məhkəmədə S. Quliyevin hüquqlarını müdafiə edən vəkil İlhamə Həsənova isə APA-ya açıqlamasında qarşı tərəfin verdiyi məlumatın yanlış olduğunu qeyd edib: “Məhkəmə prosesində həm Sərxan Kərəmoğlunun ilkin iddiası, həm də İlhamə Quliyevanın qarşılıqlı iddiası rədd olunub. Burada İlhamə Quliyevanın qalibiyyətindən söhbət gedə bilməz”.
Vəkilin sözlərinə görə, məhkəmə prosesində İ. Quliyevanın vəkili Şəfiqə Nağıyeva qərara etiraz edərək bununla bağlı apellyasiya şikayəti verəcəyini bildirib. İ. Həsənova isə apellyasiya şikayəti vermək niyyətlərinin olmadığını deyib.
Hakim Abbas Rzayev isə APA-ya bildirib ki, S. Kərəmoğlunun İ. Quliyevaya qarşı və İ.Quliyevanın S.Kərəmoğluna qarşı mülki qaydada qaldırdıqları şərəf və ləyaqətə, işgüzar nüfuza xələl gətirməsi ilə bağlı maddi və mənəvi ziyanın ödənilməsinə dair qarşılıqlı iddiaları təmin olunmayıb.
Qeyd edək ki, Sərxan Kərəmoğlu İlhamə Quliyevanın 15 min manat, İ. Quliyeva isə S. Kərəmoğlunun 50 min maddi, 30 min manat isə mənəvi ziyana görə cərimə olunmasını tələb edib.