Şou-biznes

Ana səhifə

Şou-biznes

Faiq Ələkbərli: “Sərxan Kərəmoğlu söz verdi ki, bundan sonra İlhamə xanımın adını mətbuatda hallandırmayacaq”

23 yanvar 2009 12:32 (UTC +04:00)

Bakı. Ülkər Qasımova-APA. “Bir neçə gün bundan əvvəl Sərxan Kərəmoğlu Moskvadan mənə zəng vurmuşdu. Telefonda bildirdi ki, artıq dərəcədə səndən xahiş edirəm, mənimlə bağlı heç bir məlumat yazma. Nevroz adamam, əsəblərim yerində deyil. İnternetə baxıb əsəbiləşmək istəmirəm. Mən də ona dedim ki, biz məhkəmədə olan proses barədə jurnalistlərə açıqlama veririk və bu vəzifə borcumdur”.

APA-nın məlumatına görə, bu açıqlamanı xalq artisti İlhamə Quliyevanın mətbuat katibi Faiq Ələkbərli yayıb. O bildirib ki, Sərxan Kərəmoğlu onunla söhbəti zamanı İlhamə xanıma böyük hörməti olduğunu deyib. Hətta Sərxan Kərəmoğlu bundan sonra İlhamə xanımın adını nə mətbuatda, nə də ictimaiyyət arasında çəkməyəcəyinə söz verib: “Sərxan dedi ki, Moskvada olan dost-tanışları, tanınmış aktrisalar ona “Sərxan, həyat yoldaşınla savaşmısan?” deyə sual ünvanlayırlar. Moskvada yaşayanlar məni “Adam ol” filmindən İlhamə xanımın həyat yoldaşı kimi tanıyır. İlhamə xanımı heç kimin fitvası ilə məhkəməyə verməmişəm. O, məni Baş Mütəşəkkil Cinayətkarlığa Qarşı Mübarizə İdarəsinə verdiyi üçün mətbuat konfransı keçirdim. Hər zaman mən İlhamə xanımın stolunun başında əyləşmişəm, heç vaxt o xanımdan pislik görməmişəm. Nə səhv işlətmişdimsə, pis addım atmışdımsa, gətizdirərdi məni qarşısına və səhvimi deyib üzümə tüpürərdi. Guya deyirlər ki, mən Flora Kərimovanın sözü ilə oturub-durmuram, o məni qızışdırmır. Heç də belə deyil. Flora Kərimova ilə İlhamə Quliyevanın məhkəməsinə getmək fikrində deyiləm, iki sənətkarın savaşına heç bir aidiyyətim yoxdur. Mənim nəyinə lazımdır?”

F. Ələkbərlinin yaydığı bu açıqlamaya Sərxan Kərəmoğlu da biganə qalmayıb. Məsələyə münasibətini bildirən S. Kərəmoğlu bu danışığın həqiqət olduğunu deyib: “Bilirsiniz, mən heç kimə barışıq təklif etməmişəm və belə bir niyyətim yoxdur. Sadəcə olaraq dava-dalaşın səngiməsini istəyirəm. Zəngim isə heç də üzr istəmək məqsədi daşımayıb. Barışıqdan heç söhbət gedə bilməz. Əgər barışmaq istəsəm elə İlhamə Quliyevanın özünə zəng edərəm, daha Faiqə niyə zəng edirəm ki?”