Şou-biznes

Ana səhifə

Şou-biznes

İlhamə Quliyeva: “Sərxan Kərəmoğlu dedi ki, bu işin arxasında duranların kimliyini mənə açıqlayacaq”

26 yanvar 2009 13:41 (UTC +04:00)

Bakı. Ülkər Qasımova - APA. Xalq artisti İlhamə Quliyeva ilə Sərxan Kərəmoğlu arasındakı qalmaqal getdikcə səngiyir. İ. Quliyeva APA-ya açıqlamasında S. Kərəmoğlunun onunla telefon əlaqəsi saxladığını və günahını boynuna aldığını deyib: “Bir neçə gündür Sərxan mətbuat katibim Faiq Ələkbərli ilə əlaqə saxlayır və peşman olduğunu, mənimlə danışmaq istədiyini bildirir. Dünən gecə Faiqi görüşə çağırıb və mən icazə verdikdən sonra görüşüblər. O, Faiqə mənimlə telefon bağlantısı yaratmaq istədiyini söyləyib. Danışdıq. Mənə dedi ki, “İlhamə xanım, bu işlərin arxasında dayanlar var, bizim görüşməyimiz çox vacibdir, hər şeyi sizə açıqlayacağam”. Bu gün gedib, məhkəmədə mənə qarşı qaldırdığı iddianı geri götürüb”.

İ. Quliyeva bildirib ki, həqiqətən də S. Kərəmoğlu ərizəsini geri götürübsə, onunla görüşə razılıq verəcək: “O bəyan etdi ki, bu işin arxasında duranların kimliyini mənimlə görüşdə açıqlayacaq. Onunla görüşməyi düşünürəm və həmin görüşdən sonra qərara alacağam ki, ona qarşı qaldırdığım iddianı geri götürüm, yoxsa yox. Ümumiyyətlə, Sərxanla 40 dəqiqəyə yaxın danışdıq. Hiss etdim ki, mənim səsim üçün çox darıxıb. Onu çox suçladım, lüzumsuz addımlarını üzünə dedim. Görüşdə Sərxanın günahsız olduğu sübuta yetsə, onu yenidən evimə qəbul edəcəyəm və yenə də süfrəmin başında oturacaq. Mənim ürəyim çox yumşaqdır və bağışlamağı bacaran insanam”.

İ. Quliyeva Flora Kərimova ilə aralarında keçirilən növbəti məhkəmə prosesində Faiq Ağayevin onun nümayəndəsi kimi iştirak etməsinə də münasibət bildirib: “Mənim səlahiyyətli nümayəndələrimin başında vəkilim Şəfiqə Nağıyeva durur. O, həm vəkilim, həm də səlahyyətli nümayəndəmdir. Mənim səlahiyyətli nümayəndələrim çoxdur, bir Faiq deyil ki. Faiqin orada danışması isə məhkəmənin gedişatından asılıdır, mən orada olmayacağam. Biz Faiqlə dostuq və məhkəmədə iştirak etməyi o özü könüllü istəyib, mən xahiş etməmişəm. İnsanlar problemli məqamlarında bir-birinin yanında olmalıdır, o da mənim yanımdadır, mən də hər zaman onun yanındayam”.

S. Kərəmoğlu isə APA-ya açıqlamasında həqiqətən də bu gün İ. Quliyevaya qarşı iddia ərizəsini məhkəmədən geri götürdüyünü söyləyib: “Telefon danışığında mən ona bu işin arxasında başqa adamın dayandığını demişəm. Ancaq bu, Flora xanım deyil, özünü reklam etmək istəyən başqa biridir. Mən həmin insanın adını öyrənəndə şoka düşdüm ki, bu qədər də namərdlik olar? Hər üçümüz birlikdə həmin adamı məhkəməyə verməliyik. Həmin adama qarşı həm İlhamə Quliyeva, həm də Flora Kərimova tərəfindən iddia ərizəsi qaldırılmalıdır. Əgər hər hansısa biri bu iddianı qaldırmasa, o zaman həmin adamın arxasında duran da odur. Mən vəkillərin bütün xərclərini öz boynuma götürəcəyəm. Bu qalmaqallarda Sarxanın səbri, pulu gedib, ailəsində söz-söhbətlər olub. Həmin adam öz əməllərinə görə cavab verməlidir”.

İlhamə_Sərxan